Shillong, Naitung:
Ïa ka kam Gramin Dak Sevaks (GDS) kaba dei ka kam kaba rit bad kaba dei ka kam ban leit rah ïa ki shithi na Ïing Dak sha ki shnong kiba hap hapoh kata ka Ïing Dak, la hap ban thoh eksam ha ka ktien phareng bad hindi.
Ïa kane kam barit ha ki snem ba la dep la ju pynlong ïa ka eksam da ka ‘Staff Selection Commission’ jong ka Ri India. Mynta la lai snem ïa kane ka eksam la pynlong beit na Delhi bad kiba thep ïa kane kam ka dei lyngba ‘online’ kaba mut ka dei ïa baroh kawei ka Ri India.
Ïa ka ktien kaba hap ban thoh ïa ka eksam, la hap ban thoh da ka ktien sorkar jong kata ka jylla, ha Meghalaya namar ba ka ktien phareng ka dei ka ktien sorkar, kumta kiba thep ïa kane ka kam kin hap ban thoh ïa ka eksam da ka ktien phareng ne hindi.
Katkum ka jingtip kaba la ïoh, la shem ba wat la u Myntri Rangbah ka jylla u Conrad K Sangma u la shimkhia ban pynrung ïa ka ktien Khasi bad Garo ban thoh eksam na ka bynta katei ka kam ha u snem 2021 bad ka ïing dak ka la pynkylla ïa ka Office Memorandum na ka bynta ka Shatei Lam Mihngi ban pynrung kum ki ktien bynrap.
Ka shlem treikam ba ha khliehduh jong ka Ïing Dak ka Dak Bhavan, Sansad Marg kaba hap hapoh jong ka Ministry Communication Department jong ka sorkar pdeng ka la pynmih ïa ka Office Memorandum ha ka 9 Jylliew, 2023 ba la kynthup lang ïa ka ktien Khasi bad Garo kum ka ktien bynrap hynrei ïa ka ym lah ban pyntrei kam namar ka ktien phareng ka dei ka ktien sorkar ha Meghalaya.
Na ka liang jong ka Ïing Dak ka la wanrah ïa ka jingpynbna sorkar haba ïadei bad ka ktien ha ka jylla, hynrei ka ktien Khasi bad Garo ha Meghalaya dang dei ka ktien bynrap. Kumta ïa katei ka eksam kam ha Meghalaya dang hap ban thoh da ka ktien phareng lane hindi.
