Khliehriat, Naitung:
Ka Mihmyntdu Community Social Welfare Association (MCSWA) ha ka 1 tarik Jylliew ka la pynlong ïa ka jingïalang plie ïa ka ‘Skill Training Programme’ na ka bynta ka General Duty Assistant bad Home Health Aide ha ka prokram ba la pynlong ha DMF Building Deinchynrum, East Jaiñtia Hills District ha kaba la wan ïashim bynta da ka Additional Deputy Commissioner, EJH, Khliehriat ka Kong JU Kharpuri bad u District Medical & Health Officer, East Jaiñtia Hills District, Khliehriat u Dr D Shylla.
Haba ai jingkren ha ka jingïalang kum ka kongsan, ka Kong Kharpuri ka la pynpaw ka jingsngewnguh ïa ka Mihmyntdu Community Social Welfare Association (MCSWA) halor ka jinglah ban pynlong ïa kaba kum kane ka prokram ai jinghikai ka ban pynmyntoi shibun ïa ki samla jong ka District hi baroh kawei.
Haba pynpaw halor ki Skill Training Programme ba la pynlong hapoh jong ka Skill Meghalaya, ka la kdew ruh halor ki jingthmu jong ka sorkar na ka bynta ban plie lad ha ka liang ka ïoh kam ïoh jam sha ki samla ka jylla kiba la pyndep ïa ki jinghikai halor ka phang kaba ïadei bad ka koit ka khiah.
Haba kren halor ka jingduna ha ka liang ki lad ïoh kam ïoh jam hapoh ka jylla, ka Kong Kharpuri ka la kyntu ïa ki nongïoh jinghikai bad ïa ki kmie ki kpa kiba wan ïashim bynta ha ka jingïalang ba kin long kiba ïar jingmut da kaba ai ruh ïa ki kyntien pynshlur ïa ki kmie ki kpa jong kine ki samla ba ïoh jinghikai ba kin ailad ïa la ki jong ki khun ba kin trei wat shabar ka jylla. Ka la ong ruh ba ka jingleit trei shabar ka jylla bad wat shabar jong ka ri ym tang ba ka plie lad ha ka liang ka ïoh kam ïoh jam hynrei kan nangkyntiew ruh ïa ki sap ki phong ki jong ki.
Katba na ka liang u Dr. D Shylla ha ka jingkren u la ban halor ka jingdonkam ïa ka Skill Training na ka bynta ki lad ïoh kam ïoh jam hapdeng ki samla, kata da kaba pynshlur ruh ïa ki samla ba ki dei ban shim ïa ka kabu namar kane kan plie lad ha ka liang ka ïoh kam ïoh jam ha ki sngi ki snem ki ban wan.
Kiwei pat kiba la aijingkren ha kane ka prokram ki kynthup ruh ia u Chief Functionary MCSWA, u Bah AJ Nongkynrih, Skill Development Officer, EJHD u Bah L Suchen bad Skills Manager Programme MCSWA, Kong Patlong.
