Shillong, Naitung:
Ka tnat School Education & Literacy jong ka tnat Pule- Puthi, Sorkar India ka la rai ban pynbiang ïa ki ICT (Information and Communication Technology) Lab bad ki Smart Classroom, katkum ki kyndon jong ka Samagra Shiksha, ha baroh ki Kasturba Gandhi Balika Vidyalaya (KGVB) bad Hostel.
Ka jingpynbiang ïa ka ICT Lab bad Smart Classroom ka long ban pynkupbor ïa ki samla pule kynthei, ban pynlong ïa kiba sngewthuh ïa ki kam digital, bad kyntiew ïa ki jingseisoh jong ki jingpule jong ki. Kane kan pyndap ïa ki jaka ba suda ha kaba ïadei bad ki kam digital. Kane ka sienjam kan ai jingmyntoi ïa 7 lak ngut ki samla pule kynthei jong ki KGBV ha ka jinglut kaba 290 klur tyngka.
Ki KGBV ki dei ki skul ba don lang bad ki jaka sah naduh klas VI haduh XII na ka bynta ki khynnah kynthei kiba dei na ki kynhun kiba kham duna ka ïoh ka kot, kum ki SC, ST, OBC, ki rit paid bad kiba duna ka ïoh ka kot. La plie ïa ki KGBV ha ki Block ba dang sahdien ka pule puthi da ka jingthmu ban pynthikna ba kine ki khynnah ki ïoh ïa ka pule-puthi kaba bha bad ban pynduna ïa ka jingïapher hapdeng ki kynthei bad shynrang ha baroh ki bynta jong ka pule puthi ha ki skul.
Mynta, ki don 5116 tylli ki KGBV kiba treikam ha 30 tylli ki Jylla/UT ha ka ri. Ka jingpynbiang ïa ki ICT Lab bad ki Smart Classroom ïa ki khynnah ha ki KGBV ka long kaba kongsan namar ki khynnah pule ha KGBV ki dei kiba wan na ki longïing kiba duna ka ïoh ka kot bad ki mad shibun ki jingeh ban ïoh ïa ka pule puthi, kynthup ka jingjngai, ki jinglong jong ka deiriti, bad ki jingeh ba ïadei bad ka jingshngaiñ.
Ka jingïoh jinghikai ha ki kam digital ka long kaba kongsan na ka bynta ka jingkiew shaphrang jong ki shimet bad ruh ha ki lad kamai-kajih. Kan ïarap ruh ban pyndap ïa ki jaka ba suda ha kaba ïadei bad ki kam digital.
Ha kane ka juk jong ka jingkiew sted ka roi ka par bad ka jingïasoh lang ka ICT bad ka jingim bad ki lad kamai-jakpoh, ka long kaba donkam ba ki khynnah pule baroh kin ïoh ïa ka kabu ban pynkhreh ïalade bad ka teknoloji kaba katkum ka juk mynta. La pynïasoh ïa ka ICT bad ka jingpule ha ki skul ban pynthikna ba ki khynnah pule kin ïoh ban mad hi ïa ki jinglong jingman, khamtam kito kiba duna ka ïoh ka kot.
Ka jingpynbiang ïa ki lad ICT kan pynthikna ba ki samla pule jong ka KGBV ki ïoh ïa ki rynsan digital, ki jingdon jingem jong ka tnat School Education and Literacy kum ka SWAYAM, SWAYAM PRABHA, National Digital Library, e-Pathshala, National Repository of Open Educational Resources, DIKSHA, bad kiwei kiwei.
