Shillong, Naitung:
U Myntri Rangbah ka Jylla Conrad K Sangma ha ka Sngi Ba-ar, u la lah ban pynurlong ïa ka jingangnud jong ka kynhun tem ba la tip kum ka Eastern Brook Band, kaba dei ka kynhun tem jong ki samla kiba don jingduna ha ka bor ïohi.
Kane ka jingpynurlong ïa ka jingangnud jong katei ka kynhun tem, ka la wan lyngba ka jinglah ban pynïoh da ki tiar tem tiar put. Kane ka dei shibynta jong ka Meghalaya Grassroots Music Programme, ka flagship prokram jong ka Chief Minister Office (CMO) ban kyntiew bad kyrshan ïa ki ‘riew don sap jong ka Jylla.
Ha kane ka kynhun tem jong ka Eastern Brook Band, ki don 4 ngut ki dkhot. Ka dei ka kynhun kaba la sdang paw ha ki rynsan put tem da ki jingtem bad jingrwai kiba sngewtynnad wat hapdeng ki jingeh ba ki ïakynduh na ka jingduna ha ka bor ïohi ki khmat.
Ka jingkyrpad jong katei ka kynhun ban pynïoh ïa ki tiar tem ka la seisoh da ka jingshimkhia hi da u Myntri Rangbah ka Jylla, uba la ïapbiej ïa ka sap, ka jingaiti bad ka jingieid jong ki ïa ka put ka tem.
Ïa kine ki tiar tem la aiti sha ki dkhot kane kynhun ha ka jingïalang ba kyrpang kaba la pynlong ha ïingsah jong u Myntri Rangbah, ha kaba u la ai jingïaroh ïa ka jingdon mynsiem jong ka kynhun bad pynshlur ïa ki ba kin ïai bteng ha ka ban pynurlong ïa ka jingphohsniew jong ki.
“Ka put ka tem ka don ïa ka bor ban jam ïa u pud bad wanrah lang shi jaka ïa ki briew. Nga sngewkmen eh ban kyrshan ïa kane ka kynhun donsap jong ki nongtem nongput bad nga phaikhmat ban ïohi ïa ki ba kin kynjoh sha ka thong ba shajrong,” la ong u Myntri Rangbah.
