Shillong Naitung 04
Ka Hynñiewtrep Youths’ Council (HYC) sengkmie khlem jingshongthait ka la ïai bteng ban pynlong biang ka jingkhynra ïa ki nongdih bad nongkhaïi drok ha ka miet jong ka 3 tarik u Naitung kiba kynthup naduh ki thaiñ Ïewduh, Motphran ter-ter shaduh Khlieh Ïew.
Wat la na ka liang ka seng ka la dep ban pynlong ïa ka jingkhynra ha kitei ki thaiñ ha ki sngi ba la leit ha kaba la ïoh ban bat ïa katto-katne ngut ki khynnah ki ju mlien ban leh ïa kine ki kam hynrei ka jingleit khynra biang jong ka seng ha kitei ki bynta jong ka Motphran bad Khlieh Ïew ka dei halor ka jingïoh pdiang biang ïa ki jingujor na ki ‘riew paidbah bad ki nongshong ïew ba ki nongdih drok ki la jyllei bha ha kitei ki thaiñ tang shu la kem dum.
Kumta na ka liang ka seng mar-mar ka la leit ban khynra ha kitei ki jaka, bad ha kane ka jingleit khynra ka seng ka la ïoh ban bat haduh 11 ngut ki khynnah kiba kynthup ïa kawei ka samla kynthei Khasi. Ha kane ka jingïoh bat ïa kine ki khynnah nongdih drok, ka seng ka la ïoh ban kurup ruh na ki ïa ki tyndong thep drok kiba thylli, ki thyrnia injek bad katto-katne ka pisa.
Kham hadien katto-katne por eiei ynda ka seng ka la dep ban talasi lut na ki pla jong kine ki nongkhaïi drok, ka la thang noh shisyndon ïa u drok ba la ïoh kurup.
Na ka liang ka seng hadien ba ka la ïoh ban tohkit ïa baroh kitei ki nongdih drok, ka lap ba ki don kiba shu im lyngkar ka jingim da kaba thiah ha ïew, ki bym don ïing don sem, kiba la shah beh na ka shnong, bad kiba shu wan dih beit tang ynda la kem dum ka bneng.
Ka seng ka la phah wan mih ïa ki kmie ki kpa bad ki bahaïing hasem jong kitei ki samla kiba don ka jingthrang ban kylla bad ban phah sumar sha ka shlem treikam ka seng kaba don ha Mawlai Nongkwar.
