New York, Naitung:
Ki bor pyniaid jong ka Delta Airlines ki la pyntip ba kawei ka liengsuiñ ka la hap ban hiar kyrkieh ha New York hadien ba ki nongleit-jingleit kiba shong ha kane ka liengsuiñ ki la shah sam da ka bam ba la sniew.”
Katkum ki khubor ba la ioh lum na ka New York Post, katei ka liengsuiñ A330, kaba kit ia haduh 277 ngut ki nongleit-jingleit, ka la mih na Detroit Metropolitan Wayne County Airport, ha shwa ka por 11 baje mynstep jong ka Sngi Thohdieng. Hynrei ka la hap ban leit phai kyrkieh noh sha ka Kad Liengsuiñ John F. Kennedy hadien ba la lap ba ka bynta jong ka kamra ba kongsan jong ki jingbam ha ka liengsuiñ ka la sniew.
La iathuh ba ki nongtrei ki la rai ban pynhiar noh shiteng lynti ia ka liengsuin hadien ba ki la iamir jingmut bad ki riew shemphang ha ka liang ka koit ka khiah.
Katba ka kompeni liengsuiñ kam shym la pynpaw kumno la lap ïa katei ka jingsniew ki bam bad ia ka jingioh kem pang kiba shong hapoh, kim shym la ai jingtip ruh katno ngut na ki 277 ngut ki nong-leit-nongwan ki la bam ïa katei ka jingbam lane hato don napdeng jong ki kiba pynpaw ïa ki dak jingshitom.
Kane ka liengsuin ka la lah ban leit hiar ha JFK ha ka por 4 baje mynstep jong ka 3 tarik u Naitung. Ki bor pyniaid ki la ioh ban phah peit bniah ia 12 ngut kiba shong ha katei ka liengsuiñ bad kiba la ioh bam ia katei ka jingbam ba la sniew hynrei la ong ba baroh 12 ngut ki la kyntait ban shah sumar ne ban pynkit ia ki sha ki jakasumar kiba don ha katei ka nongbah.
Kumta, na ka liang jong ka tnat liengsuiñ ka Delta, ka la pyntip ba ka dang tohkit bniah ia kaei kaba jia ha katei ka sngi bad ka la panmap ruh na kitei ki nongleit nongwan kiba la ioh mad ia kum katei ka jingjia ba sniewbok ha katei ka sngi.
Ha ka jingpynbna, ka Delta Airlines ka la pynthikna ïa kane ka jingjia bad ong, ”Ka liengsuiñ Delta 136 na Detroit sha Amsterdam ka la hap ban phai noh shiteng lynti sha ka Kad Liengsuiñ JFK jong ka New York ha ka step jong ka sngi Thohdieng hadien ba la mih ki khubor ba ka bynta jong ka bam hapoh ka liengsuiñ ha ka Main Cabin ka la sniew.
