Shillong, Naitung 04
Ka kynhun ki MLA kiba dei ki dkhot ka Committee on Empowerment of Women jong ka Ïingdorbar Thawaiñ ka jylla ka la pynlong da ka jingïalang ha ka 2 tarik Naitung ha ka shlem treikam u Deputy Commissioner ka West Garo Hills ha Tura.
Ïa kane ka jingïalang la wan ban ïashim bynta da ki Deputy Commissioner ka West Garo Hills bad South West Garo Hills, u Superintendent of Police (SP) ka South West Garo Hills, bad kiwei ki heh sorkar. Ka jingïakren ha kane ka jingïalang ka long beit halor ki kam thombor pyrshah ïa ki kynthei bad khynnah.
Ïa ka jingïalang la pynïaid da ka shongknor jong ka Committee, ka Kong Santa Mary Shylla, MLA ha ka jingdon lang ki dkhot kum u Marthon J Sangma, MLA, Bah Matthew B Kurbah, MLA, Bah Brightstarwell Marbaniang, MLA, Bah Gabriel Wahlang, MLA, bad u Bah Damanbiat Lamare, MLA.
Ha ka jingleit sha West Garo Hills, ki dkhot jong ka Committee ki la ïakynduh ruh ïa ka kynthei kaba la shah shoh-shah dat hakhmat ki paidbah ha ka shnong Lower Teksragre, Damal A.sim. Kumba ka long mynta, kane ka kynthei ka don hapoh ka jingpeit jingkhmih ha Tura.
Na ka liang ka Kong Shylla ka la kdew ba ha katei ka jingïalang la ïakren halor kiba bun tylli ki mat kiba ïadei bad ka West Garo Hills bad South West Garo Hills bad ki mat ba kham kongsan ki dei halor ka jingshah thombor ki kynthei bad khynnah. Ka la ong ba ka Committee ka don jingthmu ban shim ïa ka sienjam ban pynbeit ïa ki jingeh da ka jingïatreilang bad ka sorkar. Kane ka MLA ka la ong ruh ba donkam ïa ki jingïarap kum ki Shelter Home bad ki doktor ki ban ai jingsumar ïa ki briew kiba don jingthut ha ka jingmut jingpyrkhat.
Ha kaba ïadei bad ka jingleit ïakynduh ïa katei ka kynthei na ka shnong Lower Teksragre, ka Kong Shylla ka la ïathuh ba ka koit ka khiah jong kane ka kynthei ka la kham biang.
