Shillong, Naitung 04
U nongïalam ka United Democratic Party (UDP), u Bah Paul Lyngdoh u la ong ba ka ilekshon MP (Lok Sabha) kam dei ba thep ‘vote’ ban rai halor ka jingtreikam ka Sorkar MDA bad u la bynrap ba ka sur na kiba bun hapoh ka UDP ka long ban nym mih na ka MDA.
U Bah Paul u la pynpaw ïa kane halor ka jingkylli ha kaba ïadei bad ka jingsngew jong kiba bun hapoh ka UDP la ki kwah ban weng noh ne ban don beit bad ka MDA hadien ka jingrem kput ha ka ilekshon MP.
U Bah Paul u la kubur ba ha ka jingïakynduh jong ka seng dang shen ka la don ka jingïakren bad don ki jingpynpaw ba ka UDP ka rem namar ba ka don ha ka Sorkar MDA ha kaba ki don kiba pynpaw ba dei ban mih noh na ka MDA bad ki don ruh kiba pynpaw ba ka jingrem kam dei namar ka jingdon ha ka Sorkar.
U la ong ba ka jingrem ka UDP bad hiar ha ka jingïoh ‘vote’ ka dei na kiba bun ki daw ym dei ba ka don ha ka Sorkar MDA.
U la bynrap ba ka jingjop jong ka VPP ka dei beit halor ka jingpyrkhat jong kiba bun ba ka dei ka seng kaba khuid ka bym pat don ha ka bor synshar bad lada ïanujor ïa ki kyrtong, ka UDP ka sei kyrtong ynda la jan ka ilekshon ha kaba ka VPP ka la dep pynbna shisnem shwa ka ilekshon.
U la ong ba lada kren shaphang ka jingrem ki kyrtong ha ka ilekshon MP, ha man baroh 36 tylli ki konstiwensi MLA ka VPP ka la ïoh ‘vote’ bha bad lada ong ba ka UDP ka rem na ka daw ba don bad ka NPP, ka jingïoh ‘vote’ ka kyrtong ka NPP ka kham bun bam ïa ka jingïoh ‘vote’ ka UDP.
Une u nongïalam ka UDP u la ong ruh ba ka jingrem ka UDP ka dei ruh na ka daw ba shah pynsngewthuh bakla ki paidbah ba ka UDP ruh dei ka BJP bad kiba bun ki phai sha ka VPP ba ka dei kaba isih ïa ka BJP.
Kumta u la ong ba lada pyrshang ban pynshong nongrim ïa ki daw rem, kim kut ha ka nongrim kaba dei bad kawei ka ilekshon ka pher na kawei pat ka ilekshon.
U Bah Paul u la ong ba ha ka jingïakren kum ka seng, ka bun ka sur kaba ong ban nym mih na ka MDA namar lada bishar ïa ka jingtreikam ka Sorkar, tang shiteng na ki san snem ruh kam pat ïaid satia ha ka samoi treikam.
Haba kylli shaphang ka HSPDP kaba donlang bad ka UDP hapoh ka kynhun Regional Democratic Alliance (RDA) ka rem bad kam lah ban ïoh ‘vote’, u Bah Paul u la ong ba ka rukom pynsngewthuh bakla ïa ki paidbah ka long ba baroh ki seng kiba don ha ka MDA ki dei lut ki BJP.
Hynrei u la ong ba ka la don ka jingpynsngew ktien ha kine ki sngi na ka HSPDP ba kan nym donlang shuh hapoh ka RDA tangba kam pat don kano-kano ka rai da ka jingthoh.
