Shillong, Naitung:
Ka Sur Paidbah na South West Khasi Hills District (KSPSWKHD) hapoh jingïalam u Bah Kitborlang Nongrem kum u Chairman uba long ruh u Rangbah Shnong ka Rangthong ki la leit ïakynduh ïa u Symbud Myntri Rangbah ka jylla u Bah Prestone Tynsong ha ka Sngi Ba-ar ha Secretariat.
Kane ka jingïakynduh ban kyrpad shna ïa ka surok na Weiloi sha Mawkyrwat shaduh Ranikor kaba jngai palat 72 kilometre bad na Weiloi Mawsynram sha Ranikor kaba jngai 73 kilometre.
U Bah Kitborlang u la ïathuh ha kane ka jingïakynduh, u Bah Prestone u la ong ban sa pyntreikam ïa kine ki surok ynda ka sorkar ka la ïoh pisa na ka World Bank kata hadien ba ka Sorkar India, ka sorkar Meghalaya bad ka World Bank ki la dep ïasoi ïa ka jingïamynjur.
Shuh shuh u la ïathuh ba ka Sorkar Meghalaya kan ïoh pisa palat T.2000 klur na ka World Bank bad ïa kane ka surok u Bah Prestone u la buh kum ka kam kaba hakhmat namar mynta u la bthah ïa u Chief Engineer ban dang phah shna noh ïa ka Detail Project Report.
U la ai khublei ruh ïa ka Sorkar MDA-1 kaba la shimkhia ïa ka surok Mawphlang sha Weiloi namar ka dei ka surok kaba sniew bha hynrei mynta kane ka surok la kumba 50 percent la dep siangrong bad u don jingkyrmen haduh ka aïom tlang mynta u snem yn lah ban pyndep haduh Weiloi.
