Shillong, Naitung 04
U Chief Secretary ka Jylla u Bah DP Wahlang, IAS, ha ka Sngi Palei u la lum ïa ka jingïalang ban bishar bad shim jingkheiñ na baroh ki district halor ka jinglong-jingman jong ka jingjulor ki surok bad kiwei jingjulor na ka jingther jong u slap ha kine ki taïew ba la leit bad ruh ban twad jingtip halor ka jingsam ïa ki jingïarap sha ki lanot.
Ha kane ka jingïalang, la wan ban ïashim bynta da u Sanjay Goyal, IAS, Commissioner & Secretary ka tnat Revenue & Disaster Management; u Commissioner and Secretary PWD, (R&B) u Syed Md. A Razi, IRTS; ka Kong M War Nongbri, IAS, Secretary and ED, SDMA, Revenue & Disaster Management; ki Deputy Commissioner jong baroh ki District; Chief Engineer PWD Roads bad kiwei ki ophisar ka tnat PWD Roads bad Revenue & Disaster Management.
Na ka liang jong ka Sorkar Jylla ka dang peitngor ïa ka jinglong-jingman jong kane ka jinghap slap lyiur kaba la wanrah ka jingjulor jong ki jingtei, ka jingtwa khyndew, ka jingkhyllem ki dieng, ka jingshlei um bad kiwei kiwei ki jingjulor ha kylleng ki district.
La ong ba ka jinghap slap naduh ka 1 tarik Jylliew, 2024 haduh ka 3 tarik Naitung, 2024 ka la kham heh bad kiew na ka bynta ka jylla da 44%, ha kaba ka jingïoh ne hap slap ka la long haduh 1173.2 mm.
Haba phai sha ki jingshah pynjulor katkum ki district, kata ha East Jaiñtia Hills wat la ka la don ka jingtwa khyndew, hynrei ka NHAI ka la lah ban pynbit-pynbiang ïa ka surok NH-6 bad ïa ka surok Dkhiah Sutnga Saipung Moulsei Haflong (DSSMH) la maramot da ka PWD, bad ka khlem don kano-kano ka jingjulor kaba heh ha kiwei pat ki bynta ka district ha kine ki taïew ba la lah. La ong ruh ba ka pisa ïarap ruh ka la don lypa hapoh ka district.
U Chief Secretary u la bthah ruh ïa u DC ban pynsangeh noh ïa baroh ki kam tih hajan jong ki wah bad donkam ban bud ïa ki kyndon.
Haba phai sha West Jaiñtia Hills, ki jaka ba la shah ktah ki kynthup ïa ka surok Umlong-Puriang bad Dawki – Amlarem, bad ïa kane ka surok la lah ban pynbiang bad pynkhuid ïa ka khyndew.
La bthah ruh ïa ki ophisar PWD ban pynthikna ba ïa ki thliew ki syar kiba la mih namar ka jingther jong u slap dei ban pyndap noh khnang ba ki kali kiba ïaid kin lah ban ïaid khlem jingeh.
Haba phai ha East Khasi Hills, la ong ba ki la don haduh 17 tylli ki surok kiba la shah ktah namar ka jingtwa khyndew ha ki bynta bapher bapher bad ïa kine baroh ki surok la lah ban pynbit-pynbiang na ka bynta ka jingïaid beit jong ki kali.
Ha kajuh ka por, na ka liang ka DC ka la pyntip ba uwei u briew na Nongmynsong u la khlad noh na ka jingshah rong umsaw ha wah Urkaliar ha ka 23 tarik mynshem bnai bad ïa ka met la lap bad ïoh sei haduh ka 1 tarik Naitung, 2024. U Chief Secretary u la bthah ïa ka DC ban pyllait noh ïa ka pisa jingïarap katkum ki kyndon.
Ha Eastern West Khasi Hills ki la don haduh 21 tylli ki shnong kiba la shah ktah, 11 tylli ki surok ki la julor bad haduh 9 tylli ki jingtwa khyndew bad ka jingkhyllem jong ka kynroh ha surok Mairang-Rani Godown-Azara, bad ha surok Mairang-Bypass. Ha kaba la lah pat ban pynbit-pynbiang lut ïa baroh ki surok ban lah ïaid ki kali.
Ha Ri-Bhoi pat ka la don ka jingjia ba rit jong ka jingtwa khyndew ha Umbang ha ka 30 tarik Jylliew, 2024 ha kaba ym shym la don kano-kano ka jingjulor ne ka jingshah ktah ha ka leit ka wan.
Ha West Khasi Hills ka la don ka jingtwa khyndew ha Tiehsaw, ha kaba ïa ka khyndew la lah ban pynkhuid noh hapoh 24 kynta. La dep ban ithuh ruh ïa ka thaiñ kaba lah ban shah ktah na ka jingshlei um ha ka wah jong ka Malangkona-Diengdoh.
Ha South West Khasi Hills ki la don 3 tylli ki jingjia jong ka jingtwa khyndew hynrei kam shym la don pat ka jingktah ïa ka ïaid ka ïeng ki kali.
Ha North Garo Hills ruh ym shym la don ki jingjulor kiba heh bad ïa ka jingtwa khyndew baroh ruh la lah ban pynkhuid.
Ha East Garo Hills ruh la lah ban pynkhuid noh ïa ka khyndew kaba la hap na ka jingtwa khyndew kaba la jia ha shnong Songkama kata hapdeng ka Songsak bad Resubelpara, bad ha surok Songsak Mendipathar.
Ha West Garo Hills ki la don 4 tylli ki shnong kiba la shah ktah bad dkut ki lynti pynïasoh ha Pattangre ba hap hapoh ka Dalu Block, Dabelagre bad Kopogre hapoh ka Gambegre Block bad ka Sapalgre hapoh ka Selsella Block.
U Chief Secretary u la bthah ba dei ban shim baroh ki lad ki lynti ban pynthikna ba ki jaka leit shabar, ka umdih, ki dawai dashin bad kiwei ki tiar jingïarap ki dei ban poi sha ki jaka ba shah ktah hapoh ki 24 kynta. Dei ruh ban pynkynriah ïa ki briew ba shah ktah sha ki jaka ba la pynkhreh bad ha kaba dei ban pynbiang ïa baroh ki jingdonkam.
Ha South West Garo Hills ki la don 2 tylli ki jingjia twa khyndew kata ha KG Road lyngba ka Zikzak bad ha BM Road sha Bainapara Koch, ïa kaba la lah ban plie na ka bynta ki kali rit.
Ha South Garo Hills District ki la don 4 tylli ki jaka kiba la shah ktah na ka jingtwa khyndew, kata ha ka thaiñ Bolsalgre hajan jong ka Baghmara Circuit House, ha kaba la shna ïa ki subway ban ailad ïa ki kali ban ïaid ban ïeng.
U Chief Secretary u la kdew ruh ba ka pisa kaba long haduh 13.5 klur tyngka ka la don lypa bad ki DC bad yn sa pynpoi shuh shuh ka pisa. U la bthah ïa baroh ki DC ba kin buh hakhmat eh ban pynthikna ba kan nym don ka jingshah ktah jong ka leit ka wan ne ki shnong ha West Garo Hills District bad bthah ruh ïa ka tnat PWD ban pyndap lut ïa ki thliew ki syar ha ki surok.
