Shillong, Naitung 04
Ka jingïakynduh lang jong ki heh shipai ïada khappud ka India bad Bangladesh, kata, Border Security Force (BSF) bad Border Guards of Bangladesh (BGB) ka la kut noh ha nongbah Shillong ha ka Sngi Palei ha kaba baroh arliang ki kynhun shipai ki la nang pynskhem ïa ka jingïadei bad jingïatreilang ban ïakhun ïa ki kam runar kiba ju jia man la ka por ha khappud ka India bad Bangladesh kynthup ha Meghalaya bad kiwei ki Jylla ka Thaiñ Shatei Lam Mihngi kiba don markhap bad ka ri Bangladesh.
Kane ka jingkular ban don ka jingïadei bad jingïatreilang na baroh arliang ka dei lyngba ka jingsoi ïa ki mat jingïakren jong ki ar kynhun shipai kaba la tip kum Joint Record of Discussion (JRD) ha ka jingïakynduh lang ki heh shipai BSF bad BGB ha ka kyrdan Inspectors General (IGs) BSF bad Region Commanders (RCs) BGB.
Ïa kane ka jingïakynduh lang la tip kum ka Border Co-ordination Conference kaba kynthup ïa ka kynhun kaba 13 ngut ki shipai BSF kaba lamkhmat da u Inspector General (IG) BSF ka Tripura Frontier, u Patel Piyush Purusottam Das, katba ïa ka kynhun kaba 13 ngut ki shipai BGB la ïalam da u Md Shazedur Rahman uba dei u Additional Director General ka BGB bad Region Commander, Chattogram.
Kane ka jingïakynduh lang ki shipai na ki arliang ri ka la sdang ha ka 1 tarik Naitung bad kut noh ha ka Sngi Palei (4 tarik Naitung).
Haba kren sha ki lad pathai khubor, u IG ka BSF Tripura Frontier, u Patel Piyush Purusottam Das u la ong ba ki heh shipai na baroh arliang ki la ïashimbynta ban pynsngew bad ïatai halor kiba bun ki mat bad ban shim ki lad ban nang pynskhem ïa ka jingïadei bad jingïajan ha ryngkat ka jingïatreilang hapdeng kine ki shipai ïada khappud jong ki ar tylli ki ri ba markhap.
U la ong ba ki ar kynhun shipai ki la phaikhmat kyrpang ruh ha kaba ïadei bad ki kam kaikhlaw, ki kam runar bad kam sniew kiba ju leh bad jia ha ki jaka khappud, nalor ki kam khaïi tuh ïa ki tiar ki tar bad ki kynja dawai drok. La ïakren ruh shaphang ki kam pynroi ha khappud kiba dang sahteng.
Na ka liang u Additional Director General ka BGB, u Md Shazedur Rahman u la ong ba ki ar tylli ki kynhun shipai ïada khappud, BSF bad BGB ki ïeng skhem ban pynneh ïa ka suk ka saiñ ha shilynter ki jaka khappud. U la pynpaw ruh ba kum kane ka jingïakynduh ka long kaba kongsan na ka bynta ban lah pynbeit ïa ki jingeh hapdeng ki ar kynhun shipai bad ïakren sngewthuh halor kiba bun ki mat ki sienjam kiba dei ban shim lyngba ka jingïatreilang.
U Rahman u la ong ruh ba ha kine ki saw sngi, ka don ka jingai markylliang ïa ki jingmut ha ka rukom kaba sngewtynnad bad sngew paralok bha hapdeng ki ar kynhun shipai ha kaba ïadei bad ki mat kiba dei ha khappud bad ki jinglah ban tehlakam ïa ki jingsniew bad ki kam runar ha ki jaka khappud.
