Shillong, Naitung 04
Ka jingjop jong u kyrtong ka Congress na Tura konstitwensi u Saleng Sangma ha ka ilekshon MP Lok Sabha dangshen bad ka jingjop u kyrtong jong ka Voice of the People Party (VPP) u Dr. Ricky A.J Syngkon na Shillong konstitwensi ka la pynlong ïa katto-katne ki nongkitkam kiba hakhmat jong ka NPP ba kin khreh mih noh ban pynïasoh sha ka Congress.
Katkum ka khubor ba la ïoh lum, la ïathuh ba ki don katto-katne ngut ki nongkitkam kiba hakhmat ha ka National People’s Party (NPP) ki lah ban mih noh ha kine ki khyndiat bnai ban pynïasoh sha ka Congress ban pynkhreh ïa ka ilekshon MDC.
Ki khubor kiba thikna ki la ïathuh ba ïa mynta yn dang buhrieh ïa ka kyrteng jong ki nongïalam ka NPP ki ban sa mih noh namar ki dang don ka jingïakren bad ki nongïalam ka Congress.
Shuh shuh ki khubor ki la ïathuh ba kine ki nongkitkam jong ka NPP ki ban sa mih noh ki kynthup ïa ki nongïalam barim ka Congress kiba la wan pynïasoh sha ka NPP bad ki don ruh ki nongïalam ka NPP kiba la don kham slem.
Katkum ka khubor, ki la ïathuh ba ka jingthmu ban leit pynïasoh sha ka Congress ka dei namar ki la ïohi ïa ka jubab na ki paidbah ba kim pat pdiang ïa ka seng NPP ha ka ilekshon MP. Kumta ki hap ban pyrkhat ïalade ban jop ïa ka ilekshon MDC da kaba leit pynïasoh sha ka Congress kaba ki paidbah ki dang shaniah.
Kane ka jingshaniah ki paidbah ïa ka Congress ka dei ba don ki konstitwensi ki bym don shuh ki nongtrei hynrei ki paidbah ki dang don kiba jied ïa u kyrtong ka Congress ha kane ka ilekshon MP.
Ban pynthikna ïa kane, u nongthoh khubor u la ïoh ban ïakren bad u MLA ka Congress na Nongstoiñ u Bah Gabriel Wahlang, u la pynpaw ba um don jingtip eiei ba ki don ki nongkitkam ka NPP ban rung sha ka seng Congress hynrei u shaniah beit ba ki lah ban ïakren bad ki nongïalam kiba hakhmat ka MPCC.
Ki khubor ki ïathuh ba lada jia ba ka sorkar ka dang pynslem ïa ka ilekshon MDC ha KHADC bad JHADC, kiba bun ki nongkitkam kiba pynkhreh ïa ka ilekshon MDC ki lah ban mih iwei hadien iwei namar ki paidbah ki la dang ïoh daw ïa ka seng NPP.
