Shillong, Naitung 04
Ka Diengpasoh SC ka la ïoh jingjop nyngkong ha ka lympung ïalehkai Under-20 Fourth Division ba la pynïaid da ka Shillong Sports Association, hadien ba ka la lah ban pynliem noh ïa ka Mawkasiang SC da 5-1 kol ha ka Sngi Palei.
Kane ka nam jop ka la wan urlong lyngba ka hat-trick u Banpynkmen Kharsati na ka bynta ban pynlong ïa ka Diengpasoh ban khur ïa ki lai point na ka Group-F.
Ha kane ka jingïakhun kaba la long ha First Ground Polo, ka Diengpasoh ka la ïoh ban pynkhih jar nyngkong eh lyngba u Banpynkmen ha ka minit kaba 19 bad tang hadien ar minit kane ka kynhun ka la pynbud biang ïa ka kol kaba ar lyngba u Dikwes Kharumnuid.
Ka Mawkasiang ka la lah ban pynphai kylla shi kol lyngba u Letningthiang Kipgen ha ka minit kaba 29. Hadien shiteng kynta ka Diengpasoh ka la thep biang ia ka kol kaba lai lyngba u Banpynkmen (38). Une u rangïalehkai shakhmat u la thep biang sa shi kol ha ka minit kaba 41 na ka bynta ban khur syndon ïa ka hat-trick. Ïa kawei pat ka kol kaba khatduh la thep da u Suktang Baino (58) na ka bynta ban pynlong ïa ka Diengpasoh ban khur syndon ïa ka jingjop.
Ha ka jingïakhun kaba la long ha madan MFA jong ka Group-E hapdeng ka Risa Colony SC bad ka Riatsamthiah SC ki la ïasam mar shi point hadien ba ki la ïakhaid mar 1-1 kol.
Ka Raitsamthiah ka la pynkhih jar nyngkong eh lyngba u Tone-west Mawiong ha ka minit kaba 40, hynrei hashwa ban wai ka Risa Colony ka la lah ban pynphai kylla lyngba u Balajop Lapang ha ka minit kaba 70+2.
Haba phai sha kawei pat ka jingïalehkai jong ka Group-F hapdeng ka Mawphlang SC bad ka Pommura SC ki la ïakhaid hadien ba kim shym la lah ban thep kol haduh kaba kut.
Ka jingïalehkai ha ka sngi Thohdieng kan long hapdeng ka Lumpyngngad SC pyrshah ïa ka Thynroit SC ha First Ground ha ka por 1:45, kumjuh ha ka por 4 baje janmiet ka jingïalehkai kan long hapdeng ka Mawreng SC ïa ka Madanryting SC (1st Ground) bad ka Golflink SC ïa ka Umsohsun SC (MFA Ground).
