Shillong, Naitung 04
Ka kynhun ïalehkai kriket ka ri ba la lamkhmat da u u Rohit Sharma kum kapten ka la ïakynduh ïa u Myntri Rangbahduh u Narendra Modi ha ka step jong ka Sngi Palei bad hadien ka jingïalang kane ka kynhun hapoh ka jingïalam u coach u Rahul Dravid, ka la mih ban leit sha Mumbai.
Kham hashwa la pyn-khlaiñ ïa ki bor pahara ha ka kad liengsuiñ kaba ha Indira Gandhi Internatio-nal Airport khnang ban khanglad na ka jingwan tur ki paidbah, hynrei ka mynsiem jong ki paidbah kam shym khanglad ïa ki.
Te kumta ki la pynpaw ïa ka jingsngewkmen da kaba bat ïa ki poster jong u khlur nongtied ba kynsai u Virat Kohli, kumjuh ïa u kapten u Rohit Sharma bad kumjuh ïa u coach u Rahul Dravid wat la ka kontrak ka jong u ka la poi sha kaba kut, hynrei u la lah ban wanrah nam na ka bynta ka ri.
La pynkhreh ruh ïa ki ar tylli ki bus kiba la pynïeng ha T3 Terminal na ka bynta ban kit ïa kitei ki rangïalehkai sha ITC Maurya Sheraton hotel, ha kaba la pdiang burom ïa ki lyngba ki nongshad bad kiwei ki rukom pdiang burom ïa kane ka kynhun.
Kiwei ki rangïalehkai ki kynthup ïa u Rohit Sharma, Hardik Pandya, Suryakumar Yadav bad u Rishabh Pant, ki la ïasoh lang bad kitei ki nongshad na ka bynta ban pynsah kynmaw. Kane ka jinglehkmen ka la paw ruh ki bor pahara na ka bynta ban ïalehkmen lang bad ki nongïalehkai, kiba la ïoh ban ïakhublei kti ïa ki paidbah nongkyrshan.
Hadien, katei ka kynhun ka la leit ban ïakynduh ïa u Myntri Rangbah-duh ha ka jaka sah ka jong u kaba ha 7 Lok Kalyan Marg, kaba long shi bynta na ka prokram ba la dep ban pynbeit ha kane ka sngi. Te kumta kane ka kynhun ka la pynlut por haduh ar kynta ha katei ka jaka sah jong u Myntri Rangbahduh hashwa ba kin leit phai noh sha iingbasah.
Hadien kane ka jingïalang, katei ka kynhun ka la leit biang sha kad liengsuiñ na ka bynta ban leit sha Mumbai.
Lah ban pynkynmaw ba kane ka kynhun ba la ïalam da u Rohit Sharma ka la rah ïa ka nam lahduh ha ka T20 World Cup 2024, hadien ba ka la lah ban pynliem noh ïa ka South Africa da 7 run ha ka jingïakhun final kaba la long ha ka sngi Saitjaiñ.
