Tura, Naitung 04
Wat la ym pat don ka jingpynbna na ki bor pynïaid district bad ka sorkar jylla ban don ka jingshlei um ha ki jaka rithor ka rilum Garo, ki nongshong shnong ki la sdang ban mih na ki ïing sah jong ki bad ban phet sha ki jaka ba kham long shngaiñ ryngkat bad ki jingri jingdup.
Ka jinglong-jingman kaba mynta, ka la wan hadien ba ka la don ka jingbteng ha ka jingkiew jong ka um ha ka wah Brahmaputra bad wah Jinjirim kaba la dep ban bam ïa kiba bun ki jaka ha kine ki khyndiat sngi, kaba la pynlong ruh ïa ki nongshong shnong ban ieh noh ïa la ki ïing ki sem ban phet sha ki jaka ba kham shngaiñ.
Katkum ka khubor na ki nongshong shnong, ka jingkiew jong ka um na ki wah ha ki shnong bad ruh ha ki dong jong ki, ka la nang bteng ha kine ki khyndiat sngi. Kane ka la pynlong ïa ki ban mih bad ieh noh ïa la ki ïing, ha kaba ki don kiba la leit ban sah shipor hajan jong ka surok katba kiwei pat ki la kiew sha ki jaka ba kham shajrong.
“Ngi dap da ka jinglyngngoh ba haduh mynta ym pat pynbna ban don ka jingshlei um, wat haba ki surok PWD ki jong ngi ruh ki la shah tap ha ka um. Kiba bun na ngi, ki dei ki nongbylla bad mynta ngim shym la ïoh bylla namar ka jingshlei um. Ka sorkar ka la dei ban sdang ha ka ban phah noh ki jingïarap,” la pynpaw u Israful Hoque, uba dei u nongshong shnong ka Chibinang.
Ym tang u Hoque uba dei ruh u nongtrei mon sngewbha uba la kyntu ban pynïoh jingïarap, wat u President ka AMMSU u Nur Islam ruh u la buh jingkylli halor ka jingbym pat pynbiang jingïarap sha ki briew kiba la shah ktah.
“Ka jinglong-jingman kam pat man bha bad donkam ban shimkhia halor kane. Kiba bun ki ïing ki la dep ban shah tap um, kaba la pynlong ruh ïa ki briew ban mih bad ieh noh ïa la ki ïing. Ki don bun ki longïing kiba la leit ban sah shipor hajan ka surok AMPT namar ba ka long halor kaba ki lah ban leit. Ka Sorkar ka la dei ban peit bad shim khia,” la pynpaw u Islam.
Katba u MLA ka thaiñ uba dei ruh u Myntri ka Sorkar u AT Mondal u la sngew ba kane ka jingshah ktah ka dei namar ka jingther jong u slap ba la jur mynta u snem, ha kaba kam shym la don ka sngi ban rang.
“Ka um ha ka wah Brahmaputra ka la kiew palat ïa kaei kaba ka dei ban don khamtam kum ha ki bynta jong ka Dibrugrah, Majuli, Kaziranga bad Guwahati. Kane ka um la thikna ba kan sa ktah sa ïa ngi. Ka Sorkar ka dang peitngor ïa ka jinglong-jingman bad la ju pynlong jingïalang ruh na ka por sha ka por,” la pyntip u Mondal.
“Ngi long shisha ki briew kiba duk bad ngim don lad da kumwei ban im khlem ka jingkyrshan kaba wat tang shisngi ruh. Ngi donkam shisha ïa ka jingïarap jong ka sorkar bad ki bor district ban ïarap ïa ngi ha kum kine ki por kiba eh,” la pynpaw ki nongshong shnong.
