Shillong, Naitung 04
Ka Hynñiewtrep Youths’ Council (HYC) sengkmie ha ka miet jong ka 3 tarik u Naitung ha ka jingbteng ïa ka jingleit khynra biang ïa ki nongdih bad nongkhaïi drok ha ki thaiñ Ïewduh, Motphran, bad Khlieh Ïew, ka la ïoh ban bat ïa 2 ngut shipara kiba kynthup ïa kawei ka kynthei kaba don 25 snem ka rta bad uwei u shynrang uba dang 19 snem ka rta. Ka seng ka la ïoh bat ïa kine shipara ha ka por ba ki dang muja dung thyrnia drok ha ïew.
Haba ka seng ka la kylli na kine shipara, ki la phla ba ki ju ïadih bad injek drok lang shipara ha ïing. Kumta na ka liang ka seng ka la sneng-kraw ïa ki ha ryngkat ka jingphah wan mih ïa ki bahaïing hasem jong ki shapoh ka shlem treikam ka seng ban ïakren lada ki angnud bad kwah ïa ka jingkylla ha ka jingim.
Katei ka samla la ïathuh ba ka la dih drok la kumba 3 snem eiei bad ka khlem hikai satia ma ka ïa la u jong u para ban dih ïa u drok.
Ka la ïathuh ruh ba ka la dih bad injek drok lang bad u para la kumba 2 snem eiei bad ka la ïathuh ruh ba ka ju dih drok kumba arsien ha ka shisngi.
Shuh shuh ka la ïathuh ba ka ju don ka jinglehraiñ ban ïadih drok lang bad u para jong ka, hynrei namar ka jingkyrni ha u drok ka la pynlong ïa ka ba kan dih lang bad u para.
