Shillong, Naitung:
Ka Hynñiewtrep Youths’ Council (HYC) lyngba ka Education Cell ha ka 2 tarik u Naitung 2024, ka la leit ban buh da ka jingthoh hakhmat u Chairman ka Meghalaya Board of School Education (MBoSE), u C.H. Marak, IFS, halor ka jingdawa ban pynlong da ka jingtohkit kaba bniah ha kaba ïadei bad ka jingbakla ka MBoSE ban pynmih ïa ka resol jong ka Science bad ka Commerce Stream jong ka Higher Secondary School Leaving Certificate (HSSLC) mynta u snem kaba la dep ban pynmih ha ki bnai ba la dep.
Haba kren sha ki lad pathai khubor, na ka liang u Education Secretary ka seng, u samla Enlang Sawian, u la ong ba ka jingleh thurmur jong ka MBoSE ban pynmih bakla ïa ka resol jong ki katto-katne ki khynnah pule ka la wanrah ïa shibun ki jingeh na ka bynta kitei ki khynnah namar kiba bun ki la hap ban duh noh ban leit pule ïa kaei kaba ki thmu ban leit pule sha ki jaka kiba kham halor.
Nalor nangta u samla Enlang u la ong ruh ba ka Board ka dei ban shimkhia halor kane ka kam mardor bad ban leh ïa ka jingtohkit kaba bniah ban pynshitom ïa kito kiba donkti ban leh thurmur ïa ka resol khnang ba kum kine ki jingjia kin ym jia shuh nangne shakhmat.
“Na ka liang ka seng, ngi la ïoh ban ïakynduh ïa u Chairman jong ka MBoSE ban ïakren halor kane ka bynta bad ngi la dawa ba ka MBOSE ka dei ban pynlong ïa ka jingtohkit mardor ha kaba ïadei bad kiba donkti ban leh torti ïa ka resolt jong ki khynnah pule”, la ong u samla Enlang.
U samla Enlang u la ong ruh ba ka seng ka la dawa ba nangne shakhmat kum ka MBOSE kam dei ban dang ïai leh torti bad ban dang ïai ïaleh ïa kajuh ka jingbakla namar kane ka buh jingeh kaba khraw eh ïa ki khynnah pule.
U samla Enlang u la ïathuh ba ha kaba ïadei bad kane ka bynta, na ka liang ka MBoSE ka la dep ban pynbeit ïa ki jingbakla ha ryngkat ka jingwan mih ki kmie ki kpa jong kitei ki khynnah. Na ka liang u Chairman u la ong ba kane ka dei tang ka jingbakla kaba khyndiat bad kumta nangne shakhmat u la pyntikna ba kum kine ki jingjia kin ym ïai jia shuh.
U samla Enlang u la ong ba ka seng ka la kyntu ruh ïa u Chairman ka MBOSE ba un pynlong da ka jingtohkit bad ban thung da ka Special Committee hashwa ban pynmih ïa ka resolt jong ki khynnah pule khnang ba ka resol ba ka Board kan pynmih kan long ka resol kaba biang bad ka bym don kino-kino ki jingduna.
