Shillong, Naitung 04
Ka jingangnud jong u rangïalehkai badminton ka ri u Lakshya Sen ban ïai bat biang ïa ka nam lahduh ha ka Canada Open (BWF World Tour Super 500 tournament) ka ban long mynta ka taïew, kam shym la urlong na ka daw ba ka visa kaba u la aplai ka la sahkut ha High Commission jong ka Canada ha New Delhi.
Kane ka jingpynslem ka la pynlong ïa u Lakshya, uba la khmih lynti ban ïoh kilanmet shwa ban sdang ka Paris Olympics, u la hap ban sangeh noh ka ka jingthmu ban leit ïashim bynta ha katei ka lympung ka ban long ha Calgary.
Kane ka la pynlong ruh ïa u ban shah pynhiar na ka kyrdan kaba u don, kaba lah ban ktah ha ka jingpynïakap na ka bynta ka jingïalehkai Group jong ka Olympics, ha kaba ïa ki kyrdan yn sa pynbna ha ka jingïalang ha ka shlem treikam jong ka BWF ka ban long ha ka Kuala Lumpur ha ka 12 tarik mynta u bnai.
“Ka long ka lympung ïalehkai kaba nyngkong na ka bynta u Lakshya (uba bat ïa ka kyrdan ba 14 ha ka pyrthei) uba la thmu ban ïashim bynta ha ka Canada Open. Wat hapdeng ka jingshim khia na ka bynta ki 10 sngi da ka tnat ïalehkai lem bad ki bor ba dei khmih jong ka Sports Authority of India (SAI), u Lakshya um shym la ïoh ïa ka visa ban leit sha Canada bad kane ka jingthrang ban bat biang ïa ka nam lahduh kam shym la urlong.
Ha ka jingshisha u la dei ban mih na India ha ka Sngi Thohdieng. Hynrei mynta ka jingpynbeit kaba thymmai ka long ba un leit sha Marseille ha kaba un ïoh ka jingkilanmet tad haduh ban da sdang ka Olympics,” la pynpaw ki khubor.
“U la don ka visa kaba dei na ka bynta ka US bad wat la ka visa na ka bynta ka Canada kam shym la lah ban urlong ha ka por kaba biang. U rangïalehkai na Denmark uba la bat ïa ka kyrdan ba saw ha ka pyrthei u Anders Antonsen u la don ha ka kyrdan ba hakhlieh ha Canada ban ïa u rangïalehkai na Japan u Kodai Naraoka (world No. 6) bad u Kenta Nishimoto (world No. 10).
Ryngkat u Lakshya, u Kiran George (World No. 35) bad u kpa jong u Lakshya u DK Sen, kiba la thmu ban leit synran lang kum u coach, ki la hap ban sangeh noh ka jingleit na ka daw ka jingbym ïoh ïa ka visa.
