Shillong, Naitung 04
Ka MLA jong ka Sutnga-Saipung ka Kong Santa Mary Shylla, ka la ong ba kan kmen shibun ba lada ïoh sa T.290 klur na ka bynta ban maramot bad pynbha ïa ka surok NH-6 na Jowai sha Ratacherra, kumba la paw ha kawei na ka kot khubor ba la lah ban pynïoh da u MP ka VPP na Shillong.
Haba kren sha ki lad pathai khubor ha ka Sngi Palei, ka Kong Santa Mary ka la pyntip ba ka Sorkar Jylla ka la dep ban ïoh ïa ka mang pisa kaba T.200.81 klur na ka Sorkar India lyngba ka Ministry of Road Transport & Highways (MoRTH) na ka bynta ka jingmaramot pynbha ïa ka surok Jowai-Ratacherra ha ka 17 tarik Risaw, 2023 bad ïa ka kam ba la ai sha ar ngut ki kontraktor, la pyntrei ha u bnai Lber, 2024.
Ka la pyntip ruh ba hadien ka jingdon biang jong ka jingtyrwa na ka liang ka NHAI sha ka MoRTH ban ai sa kumba T.89.90 klur, ha ka 24 tarik mynshem bnai, u Myntri Rangbah Conrad K Sangma, u la leit ban ïakynduh ïa u Myntri ka MoRTH u Nitin Gadkari ban buddien halor kane ka bynta.
“Ngan da sngewkmen shibun lada ngin ïoh biang sa kumba T.290 klur na ka bynta ka jingmaramot bad pynbha ïa ka surok NH-6 Jowai Ratacherra,” la ong katei ka MLA Sutnga Saipung hadien ka jingmih khubor ha kawei ka kotkhubor ba u MP ka VPP na Shillong u Dr Ricky Andrew J Syngkon u la lah ban pynïoh ïa katei ka mang pisa tang hadien shisngi ba u la ïakynduh ïa u Nitin Gadkari.
Ha kajuh ka por kane ka MLA ka la pynpaw pat ka jinglyngngoh bad kam lah ban mutdur ba kumno tang da ka dorkhas u MP, ka Sorkar India kan burom bad pyllait ïa ka mang pisa, khlem da khmih ïa ka Detailed Project Report ne DPR, khlem da khmih ïa ka jingleh sorjamin, khlem da khmih ïa ki jingkheiñ jingdiah. Kumno ruh ka Ministry kan tip tang na ka dorkhas une u MP ba ka Jylla ka donkam T.290 klur ban maramot ïa ka surok.
