Nongstoiñ, Naitung 04
Ka Hynñiewtrep Youths’ Council (HYC) ha ka Sngi Palei ka la ïoh ban plie bad aiti noh ïa ka ïing kaba la dep ban pynshna sha kawei ka longïing jong shipara kiba dei Katei ka ïing ka dei jong ka samla Ibalawanpli Wanniang ryngkat 5 ngut ki para kiba dei khunswet ha ka shnong Nongklung ha West Khasi Hills ïa kaba ka HYC Nongklung Unit ka la ïoh ban pynbha bad shna thymmai da kaba ki la ïa synñiang ha ka jinglut jingsep kumjuh bad trei hi da ka bor met jong para dkhot ha ryngkat ki dkhot ka HYC West Khasi Hills.
Ïa katei ka ïing la ïoh ban plie bad aiti sha kitei ki shipara da u President ka HYC u samla Roykupar Synrem ha ka jingdonlang u samla Lumlang Kharsyiemlieh, President HYC West Khasi Hills, u samla Redyfernandy Sun President HYC Nongstoiñ Circle, samla Wanteibok Lyngdoh, GS HYC West Khasi Hills District, lem kiwei ki nongïalam HYC Sengkmie, u Sordar ka shnong Nongklung, u Pro Pastor BK Roy Dkhar, ki nongïalam shnong bad kiwei kiwei.
Ha katei ka sngi, ka HYC ka la ïoh ruh ban ai ïa ki jingai sngewbha sha kitei ki shipara, kumjuh ruh la ïoh ban pyntian smai ïa ki nongkitkam ba thymmai ka HYC Nongklung Unit na ka bynta ka samoi treikam jong u snem 2024-2026 ha kaba u samla Roykupar Synrem u la shim ïa ka bynta ban pynskhem.
Ka HYC ha kane ka sngi ka la ïoh ban pynkup burom ruh ïa 14 ngut ki samla jong ka shnong Nongklung bad Nongklungrum kiba la pas bha ha ki eksam bapher bapher kiba la ïoh ruh ha ka kyrdan 1st Division bad 2nd Division ha ka SSLC bad HSSLC ha kine ki snem ba la dep lyngba ka Tur Shaphrang Award 2022-2024.
U samla Roykupar haba ai jingkren u la ong, ba ka jingshna jong ka HYC Nongklung Unit ïa kane ka ïing ka pynkynmaw ïa u, ïa ki ktien kiba ong ba wat ap kyrmen ba ka jingïarap kan wan na shiliang jong ka duriaw bah ne sha shiliang u lyoh, ka jingïarap ka don ha ka lyngkhong kti ki jong nga bad ki jong phi.
“Lada ngi kwah ban ïarap ïano-ïano ruh kynmaw ngi don ïa ka bor ha la ka jong ka kti bad kata ka dei ka sien jam bad nga sngewkmen ba ka HYC Nongklung ka shim ïa kane ka sien jam ban tei ban shna pynbha ïa kane ka ïing bad kumba ong ka kam ka kren kham jam ban ïa ka ktien bad nga ïoh sngew ba ïa kane ka ïing la shna naduh u bnai Nailur, 2023 bad la pyndep mynta u snem 2024 u bnai Jylliew, kaba mut ba la shimpor 9 bnai ban shna ïa kane ka ïing,” u la ong bad bynrap “Jin lada ka HYC lane ki nongkitkam ka HYC Nongklung Unit ne jong ka West Khasi Hills ki dei ki briew kiba leit khrong lane kiba ap ïa ki trok na ki lynti ki syngkieng tharai kane ka ïing tang shitaïew la lah pyndep ban shna.”
Shuh shuh u la ong, “Nga pyntip ba ka HYC ha ka jingïaid lynti ka jong ka shiphew tylli ki snem ba ngin rakhe ïa u mawmer jong ka jingdap shiphew snem ha ka 17 tarik mynta u bnai, la lah ban ïarap bad shna ïa saw tylli ki ïing.”
