Shillong, Naitung 04
Ka Meghalaya Cricket Association ka la pyllait ïa ka thup kyrteng jong 28 ngut ki rangïalehkai na ka bynta ki lympung ïalehkai jong ka BCCI aïom 2024-25.
Ha kane ka aïom ïalehkai, ka Mehalaya kan pynkhreh ban ïashim bynta ha ar tylli ki lympung ïalehkai kata ka Col CK Nayudu Trophy ka ban sdang naduh 13 tarik u Risaw bad ka U-23 Men’s State A Tournament ka ban sdang naduh 15 tarik u Nohprah.
Ka MCA hadien ba ka la mynjur ïa ka adhoc selection committee, ka la pyllait ïa katei ka thup kyrteng jong 28 ngut ki rangïalehkai na ka bynta ka aïom ïalehkai 2023-24 bad kane ka shong kat kum ka jinglah ban ïalehkai bha jong ki ha ki jingïalehkai kiba la dep pynlong dangshen.
Ka Meghalaya kaba la wan ha ka kyrdan ba-ar ha ka Col CK Nayudu Trophy 2023-24 plate group, ka la wan ha ka kyrdan ba-ar ha ka Nagaland. U Manish Sharma bad u Abhishek Kumar ki la long ki rangïalehkai kiba kynsai ha ka jingkawang bol da kaba ki la lah ban shim haduh 45 bad 40 wiket, te kumta kine ki rangïalehkai ki la don ha kane ka thup. Katto katne ki rangïalehkai ki dei kiba la kiew kyrdan na ka kynhun ïalehkai U-19, kum u Shavian Blah, uba la lah ban khur 26 wiket ha ka Cooch Behar Trophy jong ka aïom ba la lah.
Kumta na ka liang ka MCA kan pynlong ïa ka jingpynkhreh bad ha kajuh ka por ban jied namar katei ka lympung ïalehkai U-23 ka dangsah sa tang shibnai bad la bthah ba baroh ki rangïalehkai ki dei ban long kiba biang ha ka jingkilanmet.
