Shillong, Naitung 04
Ka tnat Public Works Department (PWD) ka Jylla ha ka Sngi Palei ka la pyntip ba ka National Highway Authority of India (NHAI) ka la ïoh pdiang ïa ka mang pisa ba T.200.81 klur na ka Ministry of Road Transport & Highways (MoRTH) ka Sorkar India naduh ka 17 tarik Risaw 2023 ban maramot ïa ka surok National Highway-06 na Jowai sha Ratacharra.
Kane ka jingpynshai ka la wan na u Secretary ka tnat PWD (Roads & Bridges) ka Jylla halor ka jingmih khubor ba kam ba ka Meghalaya ka la ïoh ïa ka mang pisa ba T.290 klur na ka MoRTH ban maramot ïa ka surok NH-6, kaba long tang shisngi hadien ka jingleit ai dorkhas u MP ka VPP na Shillong u Dr Ricky AJ Syngkon sha u Myntri ka MoRTH u Nitin Gadkari.
Shuh shuh ka la pyntip ruh ba ka NHAI ka la phah biang ïa ka jingtyrwa ba T.89.90 klur sha ka MoRTH ban ker kynroh bad pynmadan bha ïa ka surok ha ki 7 tylli ki jaka kiba jur ka jingtwa khyndew ha East Jaiñtia Hills kynthup ha Sonapur Tunnel.
U la pyntip ba halor kane ka jingphah jingtyrwa ka NHAI ban ïoh ïa katei ka mang pisa, na ka liang u Myntri Rangbah ka Jylla u Conrad K Sangma ha ka 24 tarik Jylliew, u la leit ïakynduh ïa u Nitin Gadkari ban buddien ïa kane ka kam.
U Secretary ka PWD u la pynshai ba ka NHAI ka la mynjur bad tyrwa ban shna pynkhlaiñ bad pynbha ïa ka surok NH-6 hapdeng ka Jowai-Ratacherra ha ka jinglut jingsep ba kot T.200.81 klur ha ka 17 tarik Risaw, 2023. Ïa kane ka jingmynjur bad pyntip lyngba ka shithi No E-811162 ba 1 tarik Naiwieng, 2023.
U la pynshai ba ïa ka kam la pyntrei ha ar tylli ki song bad ïa ka ‘tender’ jong ka Song-I na ka bynta ban pynkhlaiñ bad pynbha kynthup ka jingmaramot naduh ka 69.200 Km sha ka 120.200 Km la mynjur bad la ai ruh ïa ka Letter of Acceptance lyngba ka shithi No.25941 ha ka 07 tarik Rymphang 2024.
La ong ruh ba ïa ka soskular kontrak la ïasoi ha ka 8 tarik Lber 2024 na ka bynta ka kam ba T.77.81 klur bad ka jingpyntrei ïa ka kam ka la sdang naduh ka 23 tarik Lber 2024.
Shuh shuh u la pyntip ba ïa ka Song-II ban pynkhlaiñ bad pynbha ïa ka surok kynthup ka jingmaramot man ka por ïa ka bynta hapdeng ka 120.200 km sha ka 171.455 Km la mynjur bad ïa ka Letter of Acceptance No 25914 la pynmih ha ka 2 tarik Rymphang, 2024. Ka song kontrak ka dei kaba T.122.99 klur bad ïa ka soskular kontrak la ïasoi ha ka 22 tarik Rymphang, 2024 bad ka kam ruh ka la sdang naduh ka 22 tarik Lber 2024.
Haba phai sha ki jaka jong ka surok NH-6 kiba jur ka jingma na ka twa khyndew, u Secretary ka PWD u pyntip ba ka NHAI ka la jied ïa ka M/s THDCIL kum ka consultant ban pynkhreh ïa ka Detailed Project Report (DPR) ban ker kynroh bad pynduna ïa ka jinglong ki riat ha ki hynñiew tylli ki jaka kiba don jingma bha kynthup ïa ka thaiñ Sonapur Tunnel.
U pyntip ba ka NHAI ka la ïasoi ïa ka MoU bad ka M/sTHDCIL ha ka 15 tarik Rymphang 2024 ban pynkhreh ïa ka DPR kaba kot haduh T.89.90 klur bad ïa kane ka DPR la dep phah sha ka Regional Office ka NHAI, Guwahati ha ka 18/06/2024 na ka bynta ban leh ïa ka tender.
