Shillong, Naitung 04
Ka Hynñiewtrep Integra-ted Territorial Organi-zation Mawryngkneng (HITO) Circle ka la pynpaw ïa ka jingpyrshah halor ka jingthmu jong ka sorkar jylla lyngba ka tnad Pynroi Sor bad ka Meghalaya Urban Deve-lopment Agency (MUDA) ban wanrah ïa ka Marten bad pynlong jaka theh ñiut ha ka shnong Nonghali kaba dang hap ha East Khasi Hills District.
Halor kane ka bynta, na ka liang ka seng ka la phah ruh da ka kyrwoh kaba shai sha ka sorkar ban pynpaw ba kum ka seng ka pdiang ïa ka roi ka par kaba wan hapoh shnong hapoh thaw, hynrei kane ka roi ka par kam dei pat ban ktah ïa ki nongshong shnong ka thaiñ khamtam ïa ka Wah Umkhen.
“Ngi pdiang ïa ka roi ka par hynrei lada kata ka roi ka par kan ktah pat ïa ki nongshong shnong bad khamtam ïa ka Wah Umkhen, ngim lah ban pdiang”, la ong ka seng.
Kum ban shu pynkynmaw hangne, na ka liang ka seng ka la dawa ba haba ka sorkar ka kwah ban wanrah ïa ka Marten bad pynlong jaka theh ñiut hapoh ka shnong, ka dei ban da twad jingmut shwa napoh shnong khnang ba kan nym don satia kano-kano ka jingwit ne jingktah ïa ki paidbah nongshong shnong ka thaiñ hadien-habud.
Ka seng lyngba u Vice President ka HITO Sengkmie, u Bah Shaniah Nongrum ha ryngkat bad u President ka HITO Mawryngkneng Circle bad u Bah Garry S. Marboh, ka la phah da ka kyrwoh kaba shai ba lada ka sorkar ka lah ban pynshisha ba ka jingwanrah ïa ka Marten hapoh ka shnong Nonghali kam don kano-kano ka jingktah katkum ki kyndon jong ka Environmental Laws, ka seng kan pdiang, hynrei lada ki ïaid lait katkum ki kyndon pat, ka seng kan ym shong kli-kti halor kane.
Shuh shuh ka seng ka kyntu ruh ïa ka sorkar ba kam dei ban bamja khluit namar ba kane ka jaka kaba ka la thmu ban buh ïa ka marten, ka dei ka jaka kaba don markhap bad ki jaka rep jaka riang bad kaba don ha syndah bad ka Wah Umkhen kaba lehse, kan ktah ruh ïa ki dohum-dohwah kiba im ha kane ka jaka.
Ka seng ka la ong ruh ba kum ka seng ka ai jingkyrshan ïa ka jingïalang paidbah ka ban sa long ha ka 6 tarik u Naitung 2024 ban ïakren halor kane ka bynta, bad ka la ong ba kan don ha ka liang ka jingrai bad ka sur jong u paidbah lada ka long ha kano-kano ka sur kaba u paidbah u rai ha katei ka sngi.
