Shillong, Jylliew 04
Ka khubor ba la ïohlum lyngba ka ‘Website’ jong ka tnat pulit ka jylla ha ka Sngi Palei ka ïathuh ba kawei ka nongshong shnong ha Shillong ka la ujor ba kawei ka briew ïa kaba la tip kyrteng kum ka Bini George, kaba dei ka mynnong (Agent) ban pynrung kam ïa kiba leit trei shabar ri, ka la pan pisa T. 15 lak na ka bynta ban pynïoh kam ïa u para jong u ha ka Ri Israel.
Ki pulit ki la ïathuh ba ha ka 19 tarik Kyllalyngkot, 2024, katei ka nongshong shnong kaba la ujor ka la siew T. 5 lak lyngba ka ‘Google Pay’ sha katei ka mynnong bad ïa ka pisa kaba sah, la siew da ki kmie ki kpa jong ka nongujor. Hynrei la ong ba kham hadien katei ka nongujor ka la sngewthuh ba ka la shah shukor. Nalorkata, katei ka nongshah ujor ka khlem pat pynphai ïa ka pisa kaba la dep ai sha ka wat hadien ba la kut u bnai Jylliew 2024 kumba ka la kular.
Ha kawei pat ka jingjia, uwei u nongshong shnong ha Shillong u la ujor ba ha ka 2 tarik Naitung, ka pisa kaba don T. 25,000 na ka ‘Bank Account’ jong u ka la shah khate khlem ka jingtip ka jong u.
Shuh shuh ka khubor na ki pulit ka ïathuh ba ha ka 2 tarik Naitung ha ka por kumba 7:30 janmiet, ar ngut ki briew ki bym lah ban ithuh bad kiba la shong da ka ar shaka, ki la pynsangeh ïa ka ar shaka ba la ñiah da u Guddu Prasad ha Zikzak Road, Shillong bad ki la knieh jubor ïa ka synduk kaba don sikret bad shongdor kumba T. 60,000, bad hadien kata, ki la phet krad na katei ka jaka.
Nalorkata, ki pulit ki la ïathuh ba u Joel Syngkli u la ujor ba ha ka 1 tarik Naitung, ki runar ki la tuh ïa ka thuk-thuk jong u (AS-01FP-9942) na Lailad, Ri-Bhoi.
