Shillong, Naitung 04
Ha kawei ka jingjia, uwei u nongshong shnong na kawei ka dong ha West Jaiñtia Hills u la ujor sha ki pulit ba u la shah shukor T. 20 lak hadien ba u la bei tyngka lyngba kawei ka Mobile App.
Katkum ka khubor ba la ïohlum na ka ‘Website’ jong ki pulit ka jylla, la ong ba utei u nongshong shnong u la ujor ba ha ka 6 tarik Kyllalyngkot, 2024, hadien ba u la ïoh pdiang ïa ka jingtyrwa u la pynïasoh bad kawei ka kompani kaba treikam lyngba ki rynsan ‘Online’ ïa kaba la tip kyrteng kum ka ‘Zerodha Trading App’.
Utei u nongujor u la ong ba u la pynïasoh sha katei ka App hadien ba u la ïoh ïa ka jingtyrwa na ka ‘Alice’. Hadien ba u la pynïasoh, u nongujor u la ong ba u la bei pisa T. 20 lak lyngba ka ‘top-up’ kaba don ha katei ka Mobile App (Online Application Wallet). Hynrei, utei u nongujor u la ong ba kham hadien, u la sngewthuh ba u la shah shukor.
