Shillong, Naitung 04
U rangïalehkai phutbol barim ka Jylla, u George Vannie L. Nongrang u la shah thung kum u Assistant Coach jong ka klob ïalehkai Indian Super League, ka Mohammedan S.C (Reserves team), ka ban ïakhun ha ka Calcutta Football League.
U George Vannie u long uba dang-khynnah ban ïadon bynta kum uwei na ki coach ha katei ka lympung. Kham hashwa une u rangïalehkai u la shimti kum u coach na ka bynta ban ai jinghikai ïa ka Bunkerhill Gurgaon.
Kumta u Nongrang uba la dep soi ïa ka kontrak bad katei ka klob ha ka 13 tarik u Jylliew, 2024 bad mynta u la don lang bad u coach na Uganda u Hakim Ssengendo na ka bynta ban ai jinghikai ïa kane ka kynhun.
Lah ban pynkynmaw ba kine ki coach ki la sdang ïa ka samoi ïalehkai ha kane ka kynhun bad jop da 6-0 kol pyrshah ïa ka Wari FC ha ka 25 tarik u Jylliew.
Kham hashwa u Nongrang u la ïoh ïa ka jingjop na ka bynta ka Bunkerhill Gurgaonhigh, uba la pyni ïa ka jinglah jong u kum u coach ban kyntiew ïa ki rangïalehkai bad kumjuh ïa ka kynhun.
Hashwa ba un shimti kum u coach, u Nongrang u la long u rangïalehkai ha kaba u la ïalehkai na ka Sawmer SC, Rangdajied United FC, Shillong Lajong FC. U la mihkhmat ïa ka kynhun ïalehkai (U-21) ka Jylla ha ka Khelo India Youth Games 2020.
