Shillong, Naitung 04
U President jong ka Khun Hynñiewtrep National Awakening Movement (KHNAM) Youth Wing u samla Eric Swer, u la pynpaw ba wat la kane ka seng kam don ïa ki MLA bad MDC hynrei kum ki samla kin mih shakhmat ban trei na bynta ka jaidbynriew.
Ïa u samla Eric Swer ryngkat ki nongkitkam ka KHNAM Youth Wing la pynbam smai ha ka 28 tarik Naitung 2024 ha Khasi National Dorbar Hall, Mawkhar, Shillong da u President rangbah ka KHNAM u Bah Pyndap Saibon.
Haba ïoh ban ïakren bad u samla Eric, u la pynpaw ba ka kyrteng jong ka KHNAM ka thew beit tang ïa u khun hynñiewtrep kaba la sngewthuh ba kiwei ki jaidbynriew kim nym lah ban don bynta.
“Nga sngewthuh ba ka seng ka tlot namar ngim don ïa ki MLA ne ki MDA hynrei kum uwei u samla nga la dep tih bniah lyngba ki lad pathai khubor ba nga lap ba dei tang kane ka seng kaba khih kaba ksar ban shakri ïa ka jaidbynriew” u la ong.
U la ong ba ka jingrai ka jong u ban mih shakhmat ban ai ïa ka jingshakri met bad mynsiem na bynta ka ri bad ka jaitbynriew, ka ban long kyrpang beit na bynta ban pynneh pynsah, kyntiew ïa la ka riti dustur bad ka hok longtrai kum kita ki riewlum.
“Kaba kham kongsan nga ïohi ba ka KHNAM haduh mynta kam pat don dak sniew ka ban long pyrshah ïa ka jaidbynriew, dei na kane ka daw nga sa rung ha kane ka seng” u la ong biang.
U samla Eric u don jingngeit kaba skhem ba ka KHNAM kan sa rhem sa shisien, da ka jingïasnoh kti lang baroh namar u tip shai ba ki nongïalam jong ka seng, kim trei ban pynkhlaiñ ïa ka KHNAM, hynrei ki trei na bynta ka jaidbynriew.
