Shillong, Naitung 04
Ka seng kieng atiar jong ka Hynñiewtrep National Liberation Council (HNLC) ka la dawa na u Chief Executive Member (CEM) ka Khasi Hills Autonomous District Council (KHADC) ba dei ban weng noh mardor ïa ka jingpynbna ban ithuh noh ïa ka Majai kum ka Raid, kaba la pynmih da ka District Council.
Ha ka kyrwoh ba la pyllait da u General Secretary cum Publicity Secretary ka HNLC u Bah Saiñkupar Nongtraw u la ong, ka seng ka maham tyngeh ïa u CEM ba lada um lah ban pynduh pyndam noh ïa ka jingithuh ïa ka Majai kum ka Raid, kan sa pyrkhat kam da kumwei.
U la ong ba ïa ka Majai la pynïaid da ki heh saipan jong ki bar jylla lane ki ingkhong shyllangmat. Kane ka jingai jingithuh ïa ka Majai kum ka Raid, ka la pynkmen shikatdei eh ïa ki bar jylla, kiba shong ba sah ha Majai ha kaba ki la leh kmen da kaba thang ïa ki bom pataka bad ïa shad ïa kmen.
Shuh shuh la ong ruh ba ki paid Hynñiewtrep, ki la ngiah bad jlep hi khait, ïa kine ki kam thok jong ki ‘riew saiñ pyrthei bad ki kam shukor jong ka sorkar bad haba ki samla, ki kwah ban ïeng ha la ki jong ki kjat, hynrei ka sorkar ka knieh noh ïa ki kam barit-baria ki jong ki, da kaba ailad ïa ki bar jylla.
U la ong ruh ba ka jingkhang noh ïa ka karkhana pynmih dewbilat ha Mawmluh, ka jingkhang ban die shyiap bad ki par maw ka la ktah shi katdei eh ïa ka kam khaïi bad ka kamai kajih bad wat la na ka liang ka Hima, ka thawlad ban pyllait ïa ka jingkhaïi mawshun sha Bangladesh, hynrei ka KHADC, ka khanglad da ki buit ban plie lad ïa ki bar jylla, la ong ka kyrwoh.
Ka HNLC, ka kylli ruh ïa ka sorkar, la ka kwah ban pynmih ïa ka jingïakynad jaidbynriew bad jingïaumsnam ha Sohra bad ha ka bri jong u hynñiewtrep bad la kylli, la ki kwah ba u paidlang ka jaidbynriew, un hikai da ki kam ïashrut jaidbynriew, kumba leh ka BJP, RSS ban thang ïa ki kot bakhuid jong kiwei ki kynhun niam. “Wat hikai ïa ngi ba ngin pynïashrut jaidbynriew. Wat pynmong ïa ki samla jong ngi ha Sohra. Nga maham ïa phi bad ïa ka sorkar jylla, ba kam don shipai satia ban ïaleh pyrshah lane ba kin don ki suloi ban siat ïap ïa ki,” la pynkut ka kyrwoh na ka HNLC.
