Tura, Naitung:
Ka jingïai bteng ban hap slap kaba palat shi taïew hajan baroh ki bynta jong ka thaiñ Shatei Lam Mihngi ka la buh jingma ïa ki jaka thor ka Ri-lum Garo namar ka jingshlei um wat hapdeng ka jingkiew jong ka um ha baroh ki Wah bah jong ka thaiñ.
Ki nongshong shnong ha kylleng ki jaka thor na Tikrikilla, Chibinang, Phulbari, Rajabala, Hallidayganj, Mahendraganj nalor kiwei-kiwei ki la sakhi ïa ka jingkiew um ha ka rukom ba jai-jai ha kine ki khyndiat sngi ba la dep ha kaba bun na ki jaka them ki la shah tap ha ka um katba bun kiwei pat ki la shah ktah na ka shlei um.
“Ka jinglong-jingman ka la buh jingma ha kiba bun ki jaka bad ki thaiñ ki la shah ktah lypa ha ka jingshlei um. Da ka jingkhmih lynti ba u slap un nang jur ha kine ki sngi ban wan, ngi shu pynkhreh ïa kaei ka ban jia. Ïa mynta, kiba bun ki mad ïa ka shlei um kaba ha khohsiew, hynrei kan ym shim por ïa ka um ban kiew ha ryndang,” la ong u President ka All Meghalaya Minority Students’ Union (AMMSU), Nur Islam.
U Islam u la ong ba bun ki briew ki la shah ktah na ka shlei um bad la thoh ruh sha u Myntri Rangbah ka Jylla, u Conrad Sangma, ban kyrpad ïa ki lad jingïarap na bynta kito kiba shah ktah.
U DC ka West Garo Hills (WGH), u Jagdish Chelani haba kynjoh sha u, u la ong ba u khmih bniah man ka sngi ïa ka jinglong-jingman bad ki bor distrik ki long ruh kiba peitngor halor kane ka bynta.
“Ïa mynta, lait noh kawei ka shnong, ka jinglong-jingman kam da don jingma naba ka um ka don hapoh jong u laiñ jingma ha baroh ki Wah. Ngi long kiba peitngor bad ngi la sakhi ïa ka jinghiar ka um ha kiba bun ki jaka. Hynrei namar ka jingkhmih lynti ba kan dang don ka jinghap slap, ka jinglong-jingman ka long kaba eh ban batai. Ha kiwei-kiwei, ka Ganol ka la shlei hynrei ym pat shym la don jingujor haduh mynta,” ong u DC.
U DC u la ong ruh ba ka kynhun Disaster Management ka long kaba la khreh lada ka don kano-kano ka jingjia.
Katba ka um ha kiba bun ki Wah ka dang biang, ka don ka jingtieng ba lada ka Guwahati, Kaziranga bad Dibrugarh, ha Assam ki la ngat ha ka shlei um, ka shlei um ha ki jaka thor ka lah ban ym slem shuh.
Ha kawei ka liang, ka Tura ka la sakhi ïa ka jingshit sngi hynne mynsngi hadien ka jingther u slap ha ka por mynstep.
Ha South Garo Hills, ka jinghap slap ka la rong noh shi bynta jong ka surokbah NH – 62 ha Baghmara. Ka surok ba dang shna hapdeng ka Baghmara – Rongara ka la shah ktah ha kiba bun ki jaka bad ym long shuh ban pyndonkam namar ka jingtwa khyndew kaba la tuid sha surok ha ryngkat ka khyndew kaba la don lypa.
Kiwei-kiwei ki distrik wat hadien ka jingsakhi ïa ka jingkiew um, kim shym la phah jingtip halor kano-kano ka jingjulor haba ïadei bad ki jingdon-jingem bad ki lad pynïasoh ki khlem shah pynthut.
