Shillong, Naitung:
Ka jingpynbna da ka Executive Committee jong ka Khasi Hills Autonomous District Council (KHADC) ban pynkylla Raid ïa ka Majai ha Hima Sohra kam shym la pynsngewtynnad ïa ki khun ki hajar ka Hima. Kumta ha ka Sngi Ba-ar ki la leit ban ïakren bad u Bah Pynïaid Sing Syiem, Chief Executive Member ban dawa weng noh ïa katei ka jingpynbna (notification).
Kum ban shu kdew ba ka shlem treikam jong ka Executive Committee ka KHADC ha ka 24 tarik u Jylliew, 2024 ka la pynmih ïa ka jingpynbna ne ka Notification ba katkum ka Order kaba ha ka 21 tarik u Jylliew, 2024 ba ka Executive Committee hadien ka jingpeit bniah ka la rai ban pynim biang ïa ka Executive Order kaba la mih ha ka 07 tarik u Rymphang, 2020.
Katkum kane ka jingpynbna la ong ruh ba yn tip kum ka Raid Majai katkum ba paw ha ka Executive Committee Order 25 tarik u Jylliew, 2019.
Kum ban shu kdew ba katkum ka jingpynbna ha ka 7 tarik u Rymphang, 2020 la ong ba la pynbna ïar ha ka Hima Sohra baroh kawei ba ka Executive Committee jong ka KHADC, hadien ba ka bishar bniah ïa ka rai jong u Syiem Sohra bad ka Dorbar Hima kaba 23 tarik u Nailur, 2019, ka sngewbha ban pynbeit noh ïa ka hukum jong ka, kaba 25 tarik u Jylliew, 2019 da kaba weng noh ïa ka Paragraph 2 (iii) haduh (xi).
La bynrap ha katei ka jingpynbna ba ha kajuh ka por ïa ka kyntien ‘Raid Majai’ yn tip bad pule noh kum ka ‘Majai’ ha kaba yn pynïaid ïa ka synshar-khadar da u Syiem bad ka Dorbar katkum ka Riti ka Dustur ha ka Hima Sohra kumba la rai da ka hukum kaba 7 tarik u Rymphang, 2020.
Katei ka jingpynbna ha ka 24 tarik u Jylliew, 2024 ban pynkylla Raid ïa ka Majai, kaba dei ka kad khaïi bar ri ba heh bha kaba hap ha Hima Sohra, ka la wan ruh hapdeng ka jingdon ka jingpan jingkynthoh ha ka 30 tarik u Jymmang, 2024 da ka Executive Committee ka KHADC na u Syiem ka Hima Sohra, u Pa’iem Freeman Sing Syiem.
Katei ka jingpan jingkynthoh ka long halor ka jingujor u General Secretary ka Dorbar Shnong Majai ha ka 29 tarik u Jymmang, 2024 pyrshah ïa u Syiem Sohra halor ka jingai dulir khyndew ïa ki bym dei ki Khasi ha Majai bad ka jingthung Chairman ha ki shnong hapoh Majai.
Kane ka jingpan jingkynthoh ka la buh por tang 3 sngi ïa u Syiem ka Hima Sohra ba un jubab kata ha ka 3 tarik u Jylliew, 2024 khlem da ai daw.
Kum ban shu kdew ba ha u snem 2018 ha ka por ba dang bat Chief Executive Member (CEM) u (L) Bah HS Shylla, la weng shipor ïa u Pa’iem Freeman na ka khet Syiem halor ki jingkynnoh ai dulir khyndew ïa ki bar jylla.
Hynrei hadien ki jingwad bniah, ka Executive Committee ha u bnai Jylliew jong u snem 2019 ha ka jingïalam u (L) Bah Teiñwell Dkhar kum u CEM bad u Bah Pynïaid Sing Syiem kum u Dy CEM ba dei peit ïa ka tnat Elaka la thung biang ïa u Pa’iem Freeman kum u Syiem ba pura jong ka Hima Sohra.
Kane ka jingmih biang ka jingpynbna ban pynkylla Raid Majai ka la pynlong ïa ki khun ki hajar ban kynthoh ba kumno haba ka Executive Committee jong ka KHADC ha u bnai Jylliew, 2019 ka la lap ba u Syiem um donkti ha ka kam ai dulir khyndew bad mynta ka Executive Committee ha ka jingïalam jong u Bah Pynïaid Sing Syiem kum u Chief Executive Member bad u Bah Pynshngaiñ N Syiem kum u Dy CEM ba peit ïa ka tnat Elaka pat na ka jingujor kaba long kumjuh ha kitei ki por ka shim da ka rai kaba thmu knieh ïa ka synshar-khadar katkum ka Riti ka Dustur ka Hima Sohra.
Ka Majai ka dei ka kad khaïi bar ri kaba heh bha bad ka Hima Sohra dang shen ka la shim jingkitkhlieh ban pynïaid hi ïa katei ka kam khaïi sha Ri Bangladesh. Bad kumta ki la mih ki jingkynnoh ba ka jingpynkylla Raid ïa ka Majai ka dei da kawei pat ka jingmut jong kiba don ha ka bor ha KHADC kata ban klun jingïohnong ne ban ïoh bhah na kam khaïi bar ri ha Majai.
Na ka liang, u Bah Pynïaid Sing Syiem, CEM u la ong ba kane ka jingbuh ïa ka Raid Majai ka long ban tehlakam ïa ka rukom ai dulir khyndew sha ki bar jylla ha katei ka bynta.
Katba u Bah Titosstarwell Chyne, MDC ka Sohra uba dei u nongïalam ka Liang Pyrshah ha ïingdorbar thawaiñ KHADC, u la ong kam pat ïahap ban pynkylla Raid ïa ka Majai namar bun ki nongshong shnong hi kim dei ki trai muluk jaka bad ki dei ki bar jylla.
