Shillong, Naitung:
Ki nongïalam ka Khasi Students’ Union (KSU) na sor bad khap sor ha ka Sngi Balang ka 3 tarik Naitung 2024, ka la phah khang noh ïa baroh ki shlem treikam kiba don ha sor Shillong namar ka jingbym burom jong ki ïa ka sngi leh nïam Behdeiñkhlam.
Kane ka jingpynsangeh treikam kaba kyndit-kyndit ka kynthup ïa ki Bank, Ïing Dak, shlem treikam jong ki kompani kaba la sdang naduh ki thaiñ Mawlai kynthup ïa ka shlem treikam FCI Mawroh, Lumdiengjri, Motphran ter ter shaduh Khyndai Lad, Laban, Laitumkhrah, Malki, Nongthymmai, Nongmensong bad ha kiwei kiwei ki dong ki shnong.
Haba ïakren bad u samla Biangpor L. Paliar uba dei u Vice-President ka KSU sengkmie, u la ïathuh ba kane ka jingleit khang ka seng ïa ki shlem treikam sorkar pdeng kiba don ha Shillong ka dei namar kim shym la burom ïa ka sngi kyrpang jong ka jaidbynriew kaba dei ka sngi lehniam Behdeiñkhlam.
“Ngi ju lap bad shem haba ki shlem treikam Sorkar India ki plie kiba treikam ki dei beit ki bar jylla bad kane ka la pynbitar ïa ka seng” u la ong.
U la ïathuh ba ki nongïalam ka seng ki la leit man ki dong jong ka Shillong bad la lah ban phah khang ïa ki shlem treikam jong ki haduh ka 1:00 baje nohphai sngi.
Shuh shuh u la ong ba ka seng ka dawa na ka sorkar ba ka dei ban pynthikna ba ki sngi shuti kiba dei ki sngi kyrpang jong ka jaidbynriew naduh u Tirot Sing, u Kiang Nangbah, u Soso Tham ki shlem treikam baroh ki dei ban khang lut.
“Lada ka sorkar kam lah ban leh eiei ïa kine ki shlem treikam kiba plie ha kitei ki sngi kyrpang jong ka jaidbynriew, ngi kum ka seng ngi hap ban leh eiei” u la ong.
U la ïathuh haba ki dkhot ka seng ki kylli balei ki plie ha ka sngi shuti, ki jubab ba kim shym la tip hynrei ka seng ka la ong haba ki don hapoh ka bri u hynñiewtrep ki dei ban burom lang.
U la ïathuh ruh ba ka seng ka la dep bthah ruh ïa baroh ki nongkitkam ha ki district ba kin pynthikna ba baroh ki shlem treikam ki dei ban khang ha ka sngi shuti Behdeiñkhlam.
