Shillong, Naitung 05
U Lionel Messi u la pynlehnohei ïa ka kabu ksiar ha ka jingïashut tie-breaker, hynrei ka Argentina ka la lah ban pynliem noh ïa ka Ecuador da 4-2 kol ha ka quarter final jong ka Copa America ha ka step jong ka sngi Thohdieng ha NRG Stadium kaba ha Houston.
Te kumta ka Argentina kaba la rung sha ka semi final, kan pynkhreh ban ïakhun pyrshah ïa kawei na ki kynhun ka ban khur ïa ka jingjop ha kawei pat ka jingïakhun quarter final ka ban long hapdeng ka Venezuela bad ka Canada ha ka Saitjaiñ ha AT&T Stadium kaba ha Arlington, Texas.
Ïa ka jingïakhun semi final yn pynlong ha ka 10 tarik mynta u bnai ha MetLife Stadium kaba ha East Rutherford, New Jersey.
Ha kane ka jingïashut tie-breaker u Messi u um shym la lah ban thep ha kaba ka bol kaba u la shut ka la leit dei na diengkol.
Kane ka jingbym lah ban thep kol utei u khlur ïalehkai kam shym la pynduh mynsiem ïa ka kynhun ïalehkai jong ka Argentine, ha kaba kane ka lahduh jong Copa America 2021 bad kaba la rah ruh ia ka World Cup 2022 ka la ah ban pynurlong ïa ka jingjop.
U Julian Alvarez, Alexis Mac Allister, Gonzalo Montiel bad u Nicolas Otamendi ki la lah ban thep kol ha kane ka jingïashut tie-breaker, hynrei u rangthep kol ka Argentina u Dibu Marti-nez u la ailad tang ar kol ban shah thep ha ki rangïalehkai ka Ecuador kata ha u John Yeboah bad u Jordy Caicedo.
Te kumta ki nongkyrshan ka Argentina ka la ïoh ban lehkmen lyngba ki jingrwai bad jingshad, katba ka Ecuador ka la hap ban pdiang ïa kane ka jingshah rem bad kyrmen ban wanphai biang ha ki saw snem ki ban wan.
Ha kane ka jingïakhun ka Argentina ka la ïoh ban pynkhih jar nyngkong eh lyngba u Lisandro Marti-nez ha ka minit kaba 35. Kane ka la wan urlong lyngba ka ‘corner’ ba la shut da u Messi ha kaba utei u rangïalehkai ‘dien u la ïoh ban pynkhih jar. Hynrei shi minit shwa ban wai u Kevin Rodriguez u la lah ban pynïakhaid kylla na ka bynta ka Ecuador.
Kham hashwa ka Ecuador ka la pynlehnohei ïa ka kabu ksiar ba la ïoh da u Enner Valencia ha ka minit kaba 62. U Messi u la duh ei ïa ka kabu ksiar kaba u la ïoh ban shut. Te kumta u long u rangïalehkai u bym shym la lah ban thep kol ha kane ka Copa America, hynrei u la lah ban ïarap pynbud bol ha ka jingïakhun kaba nyngkong jong ka Argentina.
Ha kane ka jingïaleh-kai u Messi u la ïoh ban ïalehkai naduh kaba sdang haduh kaba kut, hadien ba u la wanphai ka jingmynsaw ha ki bynta jong ka shyrkait ha ka jingïakhun kaba la long ha ka 25 tarik u Jylliew ha kaba ka Argentina ka la jop da 1-0 kol ïa ka Chile bad hadien um shym la lah ban thep kol watla ka kynhun jong u ka la jop da 2-0 kol ïa ka Peru.
