Shillong, Naitung 05
Ka Hynñiewtrep Integrated Territorial Organi-sation (HITO) Student’s Wing ka la phah da ka dorkhas sha u Myntri ka tnat Pule-Dangle ka jylla, u Rakkam A. Sangma halor ka jingleh bakla bad jingleh torti da ka Meghalaya Board of School Education (MBOSE) ha kaba ïadei bad ki mark ki khynnah pule ha ka por ba ka la pynmih ïa ka risol HSSLC ha ka Science bad Commerce Stream.
Ha ka dorkhas ba ka la phah, ka seng ka la ong ba kum ka seng ka pynpaw ïa ka jingsngewkhia kaba jur halor ka jingleh torti ha kaba ïadei bad ka jingkheiñ bad pynmih bakla ïa ka risol jong ki khynnah pule da ka MBOSE.
“Ngi ngeit ba kum kine ki jingbakla ki lah ban ktah shikatdei eh ïa ka pule dangle bad ka kam ka jam jong ki khynnah pule kiba shah ktah na kane ka jingbakla bad ka dei ban don ka jingpynbeit kaba mardor halor kane ka bynta”, la ong ka seng ha ka dorkhas.
Shuh shuh ka seng ka la buh jingkylli ba kum kiei ki sienjam kiba la shim da ka tnat kaba dei khmih ïa kane halor kane ka jingleh torti? Hato ka tnat ka la leh aïu ïa kitei ki briew kiba donkti ban leh torti ban pynmih bakla ïa ka risol bad ka mark jong ki khynnah pule?
