Ka jingpynkhreh ki katto katne ki nongkitkam ba hakhmat ka seng National People’s Party (NPP) ban leit rung noh sha ka seng Congress hadien ka jingjop jong u kyrtong ka seng Voice of the People Party (VPP) na ka Shillong Parliamentary Constituency bad u kyrtong ka Congress, u Saleng A Sangma, na Tura Parliamentary Constituency ha ka ilekshon MP Lok Sabha, ka pyni ba ha ka saiñpyrthei, ym don nongshun ne paralok ba ïaineh, bad kaei ka bakongsan ka long ban peit ïa ka met lajong. Ym lah ban len ba ka jingjop kput jong ka VPP bad ka Congress na Shillong bad Tura ka la pynkhihwin ïa kiba bun ngut ki ‘riew saiñpyrthei kiba don ha kiwei pat ki seng saiñpyrthei. Imat ki la sngewthuh ba ka jingbymlah jong ka NPP ban ïakhun pyrshah ha ka rukom kaba dei ïa kine ki seng ha ka ilekshon MP, ka lah ban ktah kylla ïa ki lada ki thmu ban ïakhun ïa ka ilekshon MDC na ka NPP.
Watla ki kyrteng jong kita ki nongkitkam ba hakhmat ka NPP kiba kwah ban leit noh sha ka Congress kim pat paw satia, hynrei ka jingpynkhreh ka la ïaid. Ka long ka jingshisha ba lada pynlong noh mynta ïa ka ilekshon sha ka Khasi Hills Autonomous District Council (KHADC) bad Jaiñtia Hills Autonomous District Council (JHADC), kiwei ki seng kim don jaka hakhmat ka VPP. Lada ka jingjied jong ki paidbah ïa ka VPP ka ïaineh haduh ka MDC, khlem pep kan sar ïa ka jingjop ha Rilum Khasi bad Jaiñtia. Kiba bun ki kyrtong MDC na kiwei pat ki seng ki sheptieng ïa kata. Imat ki seng halade ba ha jaka ban ïaineh ha ka NPP bad ban ïakhun ïa ka ilekshon MDC na kane ka seng, kim don jingkyrmen ban jop. Lehse ki kham sngewshngaiñ ban don hapoh ka sem jong ka Congress namar ki paidbah, lada peit na ka jingmih na ka ilekshon MP, ki kham pdiang ïa ka ban ïa ka NPP.
Ka Congress ka dei ka seng kaba la rim. Namarkata, ka don beit ki nongkyrshan ha man la ki konstitwensi watla ka lah ban ym don MLA ne MDC ne wat tang ki nongtrei jong ka seng. Katto katne hajar ‘vote’ kan don beit ha man la ki konstitwensi la ki dei ha sor ne ha nongkyndong. Kum ban shu ong, kane ka seng ka la long doh long snam ha ki katto katne ki nongthep ‘vote’. Hynrei kan eh ban batai haduh katno kita ki nongkyrshan ka Congress kin neh lada ka lyer jong ka VPP kan ïai beh kumba ka long ha ka ilekshon MP. Na ka liang ka seng Congress, kum ka jingpynkhie im ïalade, ka lah ban pdiang da kaba suk ïa kita ki nongkitkam ka NPP namar ha kine ki lai snem naduh ba shimti u Bah Vincent H Pala kum u President ka Meghalaya Pradesh Congress Committee, kane ka seng ka la mad tang ïa ka jinghiar khamtam ha Rilum Khasi Jaiñtia. Bad wat ha Rilum Garo ruh ha ka ilekshon MLA ha u snem 2023, dei tang u Saleng A Sangma uba la jop na ka seng, bad kane ka jingjop ka dei namar ki paidbah ki mon ïa u kyrtong, bad ym dei eh ba ki jied ïa ka seng.
Ka NPP hadien ba ka la shimti ïa ka jingsynshar ha u snem 2018 ka la pynlong ïa ki paidbah ban ïoh daw ïa ka. Ngi kynmaw ba hashwa ka ilekshon 2018, kiba bun ki paidbah ki la mih shakhmat ban kyrshan ïa kane ka seng wat ha Rilum Khasi Jaiñtia. Hynrei shisien ba ka la don ha ka bor synshar, ki paidbah ki la ïoh daw. Kan long kumjuh ïa kiwei pat ki seng saiñpyrthei. Ym pat lah ban bishar than ïa ki seng katba ki dang shong ha ka liang pyrshah. Ki paidbah ruh kim lah ban wad daw than ïa kito ki bym don ha ka liang synshar. Shisien ba la pynïaid ïa ka sorkar, ki kynrum kynram kin mih beit bad ka shong ha ka jingstad jong ka seng kaba ïalam ïa ka sorkar kumno ka ïakhun ban pynbeit ïa ki kynrum kynram, ban weng ïa ki jingeh, ban pynurlong ïa ki jingangnud jong ki paidbah bad kumta ter-ter.
Lehse nangne shakhmat, ka saiñpyrthei kan nang kham itynnad bad kyllaiñ katba nang jan ka ilekshon MDC. Ka jingïarung ïa mih na kawei ka seng sha kawei pat kan don. Ka jingïaknieh ban long nyngkong ban rung sha kano-kano ka seng kan don ha ryngkat ka jingïaknieh ïa ka tiket ban ïoh long kum ki kyrtong ha ka ilekshon MDC. Ki paidbah kin sa peit bad bishar ïano kin jied bad ïano kin kyntait. Ka por kan sa batai ïa kiei-kiei baroh.
