Shillong, Naitung 05
Uwei u rangbah na kawei ka shnong ha East Garo Hills u la ujor ba ka khun jong u kaba dang 13 snem ka rta ka la jah na la ïing bad ha ka sngi ba ka jah, ka pisa, ka ksiar ka ksah, bad kawei ka ‘Mobile Phone’ ki la jah lang.
Katkum ka khubor ba la ïohlum na ka ‘website’ jong ka tnat pulit ha ka Sngi Palei, la ong ba utei u rangbah u la ujor ba ka khun jong u ka la jah naduh ka janmiet jong ka 2 tarik Naitung.
Nalorkata, u la ujor ba ha katei ka sngi ba ka jah, ka pisa kaba T. 6 lak, ka ksiar ka ksah ba shongdor T. 1.5 lak bad kawei ka ‘Mobile Phone’ ki la jah lang. Na ka liang ki pulit ki dang pynlong ïa ka jingtohkit halor kane bad khamtam ban wad ïa katei ka khynnah.
Ha kawei pat ka jingjia, ki pulit ki la ong ba u Ashis Lamare u la ujor ba ha ka 29 tarik Jylliew, ki runar ki bym lah ban ithuh ki la tuh ïa ka ‘Ipad’ bad kawei ka ksiar kaba shongdor T. 76,000 na ka ïing sah jong u kaba don ha Ladrymbai.
Shuh shuh ka khubor na ki pulit ka ïathuh ba u BDO ka Songsak, East Garo Hills, u la ujor ba ha ka 1 tarik Naitung, ki runar ki la tuh ïa kawei ka Laptop, uwei u USB Hub, kawei ka ‘Scanner’, kawei ka ‘Camera’ bad kiwei.
Sa ha kawei pat ka jingjia, u Namrul Ali u la ujor ba ha ka 1 tarik Naitung ha ka por kumba 1:30 mynstep, ki runar ki la tuh ïa ka Bolero pick-up (ML-08E-7861) jong u na Dilma Soksan, North Garo Hills.
