Shillong, Naitung 05
Ka lympung ïalehkai Under-20 Fourth Divis-ion 2024 ba la pynïaid da ka Shillong Sports Association (SSA) ka la nangjam shaphrang ha kaba ka Thynroit SC, Madanryting SC bad ka Golflink SC ki la ïoh jingjop ha ka sngi Thohdieng.
Ha ka jingïakhun jong ka Group-A kaba la long ha SSA Stadium, ka Thynroit ka la pynjem khnap haduh shiteng dorjon (6-0 kol) ïa ka Lumpyngngad SC. U Arphrangstone Warlarpih u la ïoh ïa ka hat-trick hadien ba ïoh thep kol ha ka minit 23, 48 & 70. Katba ïa ki shi kol la thep da u Albestar Kharbikhiew (37), Cleofast Kshiar (42) bad u Charles Nongrum (58).
Ha kawei pat ka jingïakhun kaba ar jong ka Group-A kaba la long ha ka First Ground, ka Madanryting SC ka la pynliem noh ïa ka Mawreng SC haduh 6-1 kol na ka bynta ban khur ïa ka jingjop kaba nyngkong. U Bankyrshan Ryndong u la khur ïa ka hat-trick hadien ba u la ïoh ban thep ha ka minit kaba 2, 35+1 & 58. Katba ïa kiwei pat la thep da u Sparlington Thongni (33), Jeremy Nongkynrih (63) bad u Baketlang Thabah (70). Na ka liang ka Mawreng ka la lah ban pynphai kylla shi kol lyngba u Wanshanbok Sohshang ha ka minit kaba 23.
Haba phai sha kawei pat ka jingïakhun kaba la long ha madan MFA, ka Golflink SC ka la pynliem noh ïa ka Umsohsun SC lyngba ka shi kol ba la thep da u Willborn Langstieh ha ka minit kaba 62.
Kane ka lympung kan bteng biang ha ka sngi Saitjaiñ ha ka por 1:45 janmiet kan long hapdeng ka New Challenger SC pyrshah ïa ka Mawlyngngad SC (First Ground) bad ka Pynthorbah SC ïa ka Them Rangshken SC (MFA Ground). Katba ha ka por 4 baje janmiet ka jingïakhun kan long hadeng ka Mawlynrei SC pyrshah ïa ka ia ka Madan SC (First Ground) bad ka Mawnianglah Youth SC ïa ka Umïew Maw U Sam (MFA Ground).
