Astana, Naitung:
U President ka Russia, u Vladimir Putin, haba iakren bad u nongialam jong ka China- U Xi Jinping ha ka sngi thohdieng, u la ong ba ka jingiadei hapdeng ka China bad ka Russia ka ka la khlaiñ shibun shah ban ianujor bad ka jinglong- jingman ha ki por ba la leit.
Kitei ki nongialam ki la ïakynduh ha lyndet jong ka jingïalang jong ka Shanghai Cooperation Organisation (SCO) hapoh Astana jong ka nongbah Kazakhstan kaba long ka kynhun saiñ hima sima kaba saiñ dur ruh ia ka ioh ka kot jong kitei ki arliang ri, ha kaba kitei ki nongïalam ki ngeit ba kane kan long ka lad ban iakhun pyrshah ïa ka jingsynshar ne jingleh donbor jong ka US ha ki kam pyrthei.
U Putin u la ai khublei ïa kane ka kynhun da kaba kyrmen skhem ruh ba kan pynkhlaiñ ïa ka bynta jongka, kum kawei na ki nongrim ba kongsan jong ka jinglong hok jong ka pyrthei kaba bun jait.
Nalor ka Russia bad ka China, saw tylli ki ri jong ka Central Asia, ka India, ka Iran bad ka Pakistan ki kynthup ha ka thup jong ki ri kiba long ki dkhot jong ka SOC.
Shuh shuh ruh la ong ba ka China ka la kylla long ka paralok ba kongsan jong ka Russia ha ka saiñ pyrthei bad ka ioh- ka kot naduh ba ka la hiar thma ia ka Ukraine ha u bnai February 2022, kaba la pynmih ia ka jingpynjari kyndon jong ki ri ka thaiñ West baroh kawei.
Kumta, u Putin ha katei ka sngi u la ong ba ka jingiadei hapdeng ka Russia bad ka China kan long kaei- kaei kaba khraw tam bad kaba biang tam ha ka histori jong ka China bad Russia.
Kumjuh ruh ha ki jingkren lyngkot jong u ha kaba sdang ha katei hi ka sngi, u Xi u la khot ieid ïa u Putin kum u “paralok barim” jong u bad u la ong ba ka jingïadei hapdeng ka China bad ka Russia ka don ha ka kyrdan kaba ha khlieh duh bad ka long kaba skhem haduh katta ba ym don ba lah ban pyniapra ia kitei ki 2 ri.
