Shillong, Naitung 05
Ka Khasi Students’ Union-East Jaiñtia Hills District Unit (KSU-EJHDU) ka la kyntu ïa ka Sorkar Jylla ban pynsted haba ïadei bad ka jingpyntrei ïa ka surokbah NH-6 khnang ban suk ka leit ka wan jong ki paidbah nongshong shnong ka thaiñ.
“Ka jingïakhih jong ki paidbah hapoh ka jingïalam ka KSU ha kane ka snem ba la leit (2023) la ar sien bad ka jingïakhih ki paidbah jong ka Dong Namchiang Elaka Narpuh la ar sien – ka jingkwah bad jingdawa ka long ban ïoh ïa ka surok ba bha khnang ba ka Jylla kan lait na ka jingjah burom bad jinglehraiñ hakhmat kiwei pat ki Jylla marjan jong ka Thaiñ Shatei Lam Mihngi,” la ong u General Secretary ka KSU-EJHDU, Bah K.S. Suchiang.
Ka seng ka la ong ruh ba wat la ki paidbah nalor ba ki la dep jied ïa ki nongmihkhmat, pynban ki hap ban mih sha surok ban ong “ngi dawa ïa ka hok”.
“Ka jingïaroh bad jingsngewnguh ka leit sha ki paidbah ba pynlong jingïakhih. Ka seng ka kyntu ïa ka Sorkar ban pyntrei hok ïa ka pisa ba la mang na bynta kane ka surokbah. Ka pisa ka wan nangno-nangno ngim tip, hynrei ngi kwah ïa ka surok ba bha,” la ong ‘utei u nongïalam.
Shuh shuh u la bynrap ba ka seng ka kyntu bad ai jingmut ïa ka Sokrar ban sdang ïa ka jingmaramot ba kyrkieh ïa ki katto-katne tylli ki jingkieng kiba lah ban twa bad dkut ha kano-kano ka por.
“La ima shisha ban peit bad ban ïaid lyngba ïa kine ki jingkieng. Kum ka jingai jingmut ban pynlut khyndiat ka pisa ban maramot da ka dewbilat ban dung da ka sleb ha kito ki bynta ba la palat ka jingjot. Lada lah ban leh kumta tang ha kine ki bnai lyiur, kan ïada shibun ïa ka leit ka wan ki paidbah,” la ong u Bah Suchiang.
