Pakistan, Naitung:
Uwei u nongialam barim jong ka Pakistan u ban ïakhun ha ka elekshon shiteng samoi u la shah pynïap ha ka Sngi Palei ha ryngkat bad 4 ngut kiwei pat ha ka jingleit thombor jong ki lehnoh ha khappud jong kane ka ri bad ka Afghanistan.
La ong ba Katkum ka jingpeit thuh ia ka jinglong- jingman ha katei ka jaka, ka pynpaw ba la don kiba la thmu bad riam bom lypa na katei ka jaka kaba long ka lynti iaid jong katei ka kali kaba utei u nongialam barim jong ka Pakistan ba u dei ban iaid lyngba. Ia kane la iathuh da u nongaiktien jong ki pulit ka distrik ha ka AFP, u bym shym treh ban pynpaw kyrteng namar ba um shym la ïoh bor ban kren sha ki lad pathai khubor.
Kumta la ong ba ka jingtohkit ka dang iaid shakhmat ban lap ia kiba don kti bad ka jingthmu jongki sha lyndet jong katei ka jingjia. Hynrei la ong ba ki kynhun lehnoh na katei ka thaiñ ki la pynjur ia kum kitei ki kam thombor jongki naduh kine ki khyndiat sngi ba la leit ruh.
Ia utei u nongialam la ithuh kum u Hidayatullah Khan bad la ong ba ki 2 ngut ki nongbud jong u bad 2 ngut ki nongap pahara jong u ruh ki la duh noh ia ka jingim jongki ha katei ka jingjia ha katei ka sngi hapoh ka distrik district, kaba don kumba 45 kilomitar (28 mile) na u pud u sam jong ka Pakistan bad ka Afghanistan, ha kaba katei ka thaiñ long ruh ka bynta kaba ka kam thombor jong ki lehnoh ka la nang kiew bad nang jur naduh ba ki lehnoh Taliban ki la ioh ban knieh hi noh ia ka bor synshar hapoh ka ri Afghanistan naduh u snem 2021.
La ong ba kane ka jingjia ka la wan jia ruh hashwa jong ka elekshon shiteng samoi kaba la pynbeit ban long ha ka 11 tarik jong une u Naitung bad kaba utei u nongialam barim u la dep pynbna ba un iakhun kum u kyrtong shimet.
