Shillong, Naitung 05
Ka Meghalaya Human Rights Commission (MHRC) kaba khmih ban bishar ïa ki jingkynnoh leh donbor ïa ka hok longbriew-manbriew ha Jylla ka la khylliap noh shisyndon ïa ka jingkynnoh leh donbor u SP barim ka East Khasi Hills district ha ka jaka shah thngan ka Kong Bindas Syiem namar uba ujor bad kito kiba sngew bitar ïa ka jingjia kim shym la wan mih satia hakhmat u nongbishar uba dei u shongknor ka Commi-ssion ha ka Sngi Thoh-dieng.
U SP barim ka East Khasi Hills district u Rituraj Ravi uba la shah kynnoh, dang shen u la leit mih hakhmat ka MHRC hadien ba u la shah ujor pyrshah ha kaba ïadei bad ka jing-kynnoh leh donbor na-mar u la leit sha ka jaka shah thngan ha u bnai ba la dep (Jylliew).
U nongbishar ba la shongthait u Justice T. Vaiphei u la ong ba ym don satia kiba wan mih hakhmat ka Commission la ka dei na uba ujor ne kito kiba sngew bitar ïa kato ka jingjia wat haba la buh por ban shim bishar ha ka por 11.30 baje mynstep.
U Justice Vaiphei u la ong namar ym don ba wan mih hakhmat ka Commission ka jingujor kam lah shuh ban ïaid shakhmat bad ha kum kane ka rukom long, ym donlad da kumwei pat hynrei ban khylliap noh shisyndon ïa kane ka jingmudui.
Na ka liang u SP barim u Rituraj Ravi u la kyntait ïa ka jingshah kynnoh ban leit leh donbor ha ka jaka shah thngan bad u ïeng katkum kaei kaba la batai ha ka tnat pulit kumba la kdew ha ka kaiphod.
U nongujor uba kyrteng u Enlang Sawian u la ujor pyrshah ïa u SP barim ka East Khasi Hills sha ka MHRC bad Meghalaya State Commission for Women da kaba kynnoh ba u SP u la thmu ban rah jubor ïa ka nong shah thngan na ka jaka kaba ka shong shah thngan ha jaka ïeng kali ka Additional Secretariat.
La kynnoh ruh ba u SP ha ka por ba u leit sha ka jaka shah thngan u don ha ka rukom long kaba la buaid.
