Islamabad, Naitung:
Ka Anti-Terrorism Court jong ka Pakistan ha Rawalpindi, ka la kyrpad ia ka sorkar bad ki bor pyniaid patok ba kin ai jubab halor jingkyrpad jong u nongialam ka seng Tehreek-e-Insaf jong ka Pakistan, u Imran Khan, ba un leit ban iakynduh markhmat ia ki khun jong u hapoh patok.
Namar la ong ba utei u Myntri Rangbahduh barim jong ka Pakistan, u la ai da ka dorkhas ban pan jingbit ban leit ïa kynduh ïa ki khun jong u, u Qasim bad u Sulaiman hapoh ka Adiala Jail ba la set ia ki.
Ha ka dorkhas jong u, u Khan u la dawa bad ong ba ka jingleit kynduh jong u ia la ki khun ka long ka hok jong u katkum ka riti synshar bad ka aiñ hapoh ka ri, bad da kaba pynksan ba ka jingiakynduh kan long kaba iadei bad ka iing ka sem, utei u nongialam barim ka Pakistan u la dawa ia ka iingbishar ba ka dei ban ailad ia katei ka jingthmu jong u.
Kumta, na ka liang ka ïingbishar, ka la bthah ïa ka sorkar, ka tnat kam poh ïing bad ia ki bor pynïaid jong ka phatok ba kin ai ïa ki jubab jong ki hapoh ka 5 tarik u Naitung bad ïa ka jingbishar la pynsangeh noh haduh ka 7 tarik jong une hi u Naitung.
Shuh shuh ruh la ong ba utei u Myntri Rangbahduh barim ka Pakistan u la shah set patok ha ka 30 tarik u Kyllalyngkot naka bynta shi snem halor kawei ka mukotduma kaba u la shah pharem ba u la phah jingtip sop-sop halor ki kam ba kongsan jong ka sorkar. Utei u nongialam u la shah set patok teng lai snem hadien ba la pynngat kyndon ia u namar ka jingdon kti ha ki kam bamsap. Hynrei, u Imran Khan, ula kyntait bad ong ba baroh kitei ki jing pharep pyrshah ia u, ki long tang ki kam sain pyrthei jong kiwei pat ki seng kiba pyrshah ia ka seng jong u.
Namar kata ruh, u la kyntu ïa ki paidbah ba kin pynphai kylliang bad kput naka bynta ka hok jong u lyngba ka jingthep vote jongki, ka ban long ha ka 8 tarik u Rymphangbad u la kyntu ruh ia ki paidbah ba kin pynpaw pyrthei bad ban pynshai sha ki nongialam ba buit-poh jong ka ri ba ngim dei ki langbrot ba kitei ki nongialam ki lan ban shu synshar tang da u dieng sympat.
U Myntri bar ri barim u Shah Mahmood Qureshi uba long u vice chairman jong ka seng Pakistan Tehreek-e-Insaf jong u Imran Khan ruh u la shah set phatok shi snem da ka iingbishar ba kyrpang kaba la thaw hapoh ka patok Adiala ha Rawalpindi.
Katei ka mukotduma, ka dei halor ka jingkynnoh, ba u Khan u la phah ia ki jingthoh bad ki jingtip ba rieh jong ka ri sha ka Washington ha ka por ba u dang bat ia ka shuki kum u Myntri Rangbahduh jong ka ri ha ki snem ba la leit.
