Mawkyrwat, Naitung 05
Ka Southern Border Sports Association (SBSA) kaba hap hapoh ka Ranikor Civil Sub-Division jong ka South West Khasi Hills District, ka la dawa ban ïoh jingithuh noh na ka Meghalaya Football Association (MFA).
Kane ka synjuk ka dei kaba don ïa ka thong ban kyntiew ïa ki sap kyrpang jong ki samla donsap ïalehkai bapher bapher kiba hap hapoh ka thaiñ Ranikor Civil Sub-Division.
Kane ka synjuk ka la thung ïa u MLA ka Ranikor Constituency Bah Pius Marweiñ kum u President, u Bah Nararian Thongni kum u General Secretary bad u Bah Kitborlang Syiemlieh kum u Vice President .
Ki nongkitkam jong kane ka synjuk haba ai jingkren ha ki lad pathai khubor, ki la pynpaw ba ka daw kaba kongsan tam ba ki seng ïa kane ka Southern Border Sports Association wat la ki la don lypa ïa ka Mawkyrwat District Sports Association (MDSA), hynrei haba phai ha ki kam ïalehkai bapher bapher shibun ki samla jong ka thaiñ khappud ki don shibun kiba la paw bha ym tang ha ki jingïalehkai kynjatbol, hynrei ha kiwei pat ki de ki kam ïalehkai.
Haba phai pat sha ki klob bapher bapher ki shem shibun ki jingeh na ka daw ka jingjngai palat na ki shnong ki jong ki wat la ki kwah ban ïasnoh kti lang ban wan ïashim bynta hapoh ka MDSA ha Mawkyrwat kaba dei ka Head Quarter jong ka South West Khasi Hills District.
Namarkata kum ki nongïalam jong ka Southern Border Sports Association ki sngew dei ïa ka Meghalaya Football Association (MFA) ba kan ithuh kyrpang noh ïa ka Southern Border Sports Association (SBSA) ba kan don noh ïa ka jong khnang ba kan long ka jingmyntoi ïa ki khun samla na katei ka thaiñ.
