Imphal, Naitung:
Ki pulit jong ka Manipur ki la lap ïa u bom IED hakhmat kawei ka dukan, ha kaba la buh ïa u kum shi bynta ban pynma na ka bynta ka jingdawa pisa. Ka kynhun pyllip bom jong ki pulit ka Manipur ki la lah ban pynduhbor ïa une u bom ba la buh ha Ukhrul Bazaar kaba don ha Ukhrul distrik.
U bom ïa uba dei ban pyndonkam da u Remote-Controlled, la lap hakhmat ka dukan RR Store Grocery Shop kaba don ha Wino Bazar. Kane ka dukan ka dei kaba la long trai da u Ramsunder Thakur, uba dei u trai shnong na Bihar. Hadien ba la ïoh jingtip halor ka jingjia, ka kynhun pyllip bom jong ka jylla mar mar ka la leit sha katei ka jaka bad pyllip ne pynduhborïa u bom.
Ha kaba ïadei bad kane ka jingjia, kiba bun na ki kynhun seng kiba don ha Ukhrul distrik, kynthup ka Hunphun VA, All Hunphun Tangs Association, Hunphun Katamnao Long, bad Wino Tang, ki la pynrem jur ha kaba ïadei bad ka jingbuh bom ha kane ka dukan. Ki la ong ba ka jingbuh bom ha ki jaka paidbah ban dawa pisa ka long ka kam pyntriem kumba leh ki lehnoh bad thmu ban pynjur ïa ki kam pyntriem bashyrkhei.
