Nongpoh, Naitung:
Ki paidbah nongshong shnong jong ka Mawïong, Ri Bhoi District ha ka Sngi Ba-ar ki la mih paidbah ban leit tur sha ka shlem treikam jong ka tnat PWD ha Nongpoh ban pan jingshai halor ka jingshah pynpra jong ka surok shnong kaba la wanrah jingeh shikatdei ïa ki paidbah nongleit-nongwan jong ka shnong.
Ki paidbah ba kynthup naduh ki longkmie-longkpa bad ki samla hapoh ka jingïalam jong u Rangbah Shnong, Bah Mathius Maring ki la mih ha katei ka step ban leit tur sha ka shlem treikam jong ka PWD ha kaba la wan ban synran lang ruh da u Bah Donroi Kshiar, President jong ka Hynñiewtrep Achik National Movement (HANM) Ri Bhoi District.
U Rangbah Shnong jong ka Mawïong, Bah Mathius Maring, u la ïathuh ba ka daw kaba la pynlong ïa ki ban mih paidbah ha kane ka sngi, ka dei hadien ba shi bynta jong ka surok kaba pynïasoh sha ka shnong Mawïong kaba jngai kumba 80 meter eiei ka la shah pynpra noh bad kaba la shu ieh mynta la kumba 5-6 bnai eiei.
Utei u nongïalam shnong u la ong ruh ba ïa katei ka surok la pynpra da u kontraktor uba pyntrei pynbha ïa ka madan ïalehkai jong ka shnong Pahambirthem kaba don marjan khlem da kynjoh ktien ne ïakren bad ki nongïalam jong ka shnong Mawïong. U la ïathuh ba katei ka jingpynpra ïa katei ka surok ka la buh jigneh shikatdei ïa kiba bun ki paidbah kiba pyndonkam ïa katei ka surok, khamtam kiba pang ba shitom bad ki khynnah skul.
Halor kane ka bynta, na ka liang jong ki nongïalam shnong, ki la buh ïa ka jingkyrpad sha ka tnat PWD Nongpoh ba kan shimkhia ban pynbha noh mardor ïa katei ka surok bad lada jia ba kim leh eiei, na ka liang ka jong ki kim don lad shuh da kumwei, hynrei ban mih madan bad ïakhih na ka bynta ka jingbit jingbiang lang jong baroh.
