Shillong, Naitung 05
U General Secretary ka Hill State People’s Demo-cratic Party (HSPDP) Bah Panbor Ryntathiang u la pyntip ba ka seng kan sa shong jingïalang lashem taïew bad ki nongkitkam ka UDP ban ïakren halor ka Regional Democratic Alliance (RDA).
U Bah Panbor u la pynpaw ïa ka jingsngewlyngngoh halor ka jingmih ki khubor ba ka seng kan ïakhlad lok noh bad ka UDP ha ka RDA.
“Ngin sa shong jingïalang lashem taïew para nongkitkam ka HSPDP bad ngin hap ban ïakynduh ïa ki nongkitkam ka UDP ban pynbeit ïa kine ki khubor” u la ong.
U la ong ba haduh mynta kam pat don kum kata ban ïakren ban ïakhlad lok noh bad ka UDP hynrei kin dang pynskhem nangne shakhmat.
Kum ban shu pynkynmaw, ka UDP bad ka HSPDP ki la pynkhlaiñ ïa ka RDA kum ki seng riewlum ban pynïeng tang uwei u kyrtong kaba ki la jied ïa u Bah Robertjune Kharjahrin ban ïakhun ïa ka ilekshon MP Lok Sabha hynrei u khlem poi sha ka thong.
Ka UDP bad ka HSPDP kin dang pynkhlaiñ nangne shakhmat haba ka ilekshon MDC ka la jan long ha KHADC bad JHADC.
