Shillong, Naitung 05
U Editor ka kotkhubor ‘Mawphor’, Bah Deimaïa L. Siangshai ha ka Sngi Thohdieng u la shah jied kum u President bathymmai jong ka Shillong Press Club (SPC).
U Bah Siangshai uba la ïoh 91 ‘vote’ u la pynrem noh ïa u Bah Joe Thangkhiew jong ka ‘Batesi TV’. Ha kajuh ka por, u Bah Siangshai u la mih bujli ïa u President barim, Bah David O. Laitphlang.
Lah ban kdew ba kane ka ilekshon ka la wan hadien 14 snem. Ka ilekshon bakhatduh ban jied ïa ki nongkitkam ka SPC ka la long ha u bnai Rymphang jong u snem 2010.
Haba phai sha kane ka ilekshon, baroh ki la don 164 ngut ki nongthoh khubor bad dkhot jong ka SPC kiba la ïashim bynta ha ka jingthep ‘vote’ hapoh ka jingkhmih jong ki ophisar ka tnad Directorate of Information & Public Relations (DIPR).
Nalor u Bah Thangkhiew uba la ïoh 67 ‘vote’, u Bah Raphael Warjri uba la ïakhun lang ïa ka kam President, u la ïoh 6 ‘vote’.
Haba phai sha ka kam General Secretary, u Bah Dominic Savio Diengdoh jong ka ‘T7 News’ u la ïoh ïa ka jingjop kaba suk khlem don mano-mano ban ïakhun pyrshah ïa u.
Ha kajuh ka por, u Bah Greshome Hat, Editor ka ‘Peitngor’ uba la shah jied kum u ‘Treasurer’ bad ïoh 113 ‘vote’, u la pynrem noh ïa u Bah Martin Nongkhlaw uba la ïoh 50 ‘vote’.
“Nga ai khublei ïa baroh ki dkhot kiba la ai ka jingshaniah bad jingkyrmen ha nga. Nga ngeit ba da ka jingkyrshan bad jingïatreilang jong phi, ngin jam shaphang bad trei shit rhem ha ka ban pyntyllun ïa ki kam jong ka SPC,” la ong u President bathymmai, Bah Siangshai haba ai jingkren ha kane ka sngi.
U la ban jur halor ka jingïatreilang kum ka kynhun ban pyntikna ïa ka jingpyntreikam jong baroh ki kam ba sahteng jong ka SPC.
U Bah Siangshai u la ai khublei ruh ïa ka DIPR kaba la lah ban pynlong ïa ka ilekshon ha ka rukom kaba ïaid beit ïaid ryntih bad kaba khuid ba suba.
Ha kane ka sngi, la ïoh ruh ka jingkren na u Director ka DIPR, u Malthus S. Sangma uba ai khublei ïa ki nongïalam ba shah jied thymmai jong ka SPC.
