Shillong, Naitung 05
Ka executive committee jong ka AIFF shen kan ïamir jingmut lang halor ka jingthmu ban pyntreikam ïa ki kyndon ha ka jingïalehkai phutbol kiba la pruid dak naduh u snem 2019 hadien ba ka I-League Clubs Association ka la phah ïa ka jingthoh sha kane ka synjuk, ha kaba kaba ïadei bad ki katto katne ki mat.
Kat ka jingpriud dak naduh u snem 2019 ha kaba ïadei bad ka jingïalehkai phutbol hapoh ka ri la ong ba ka lympung ïalehkai Indian Super League (ISL) ka dei ban don ka jingshah pynhiar kyrdan ïa ki kynhun kiba wan shatrai naduh ka aïom ïalehkai 2024-25, hynrei haduh mynta yn pat shym la lah ban pynbna paidbah halor kane ka bynta. Ka lympung ïalehkai ISL kan sdang naduh 14 tarik u Nailur.
Kiwei pat kiba la pruid dak ki la urlong ha kaba ka lahduh jong ka lympung I-League 2022-23, ka Punjab FC ka la kiew kyrdan sha ka ISL (2023-24). Kumjuh ka Mohammedan Sporting kaba long ka lahduh jong ka I-League 2023-24, ka la kiew kyrdan sha ka ISL (2024-25).
Ha ka shithi sha u President ka All India Football Federation bad uba long u dkhot ka executive committee, u President ka I-League Clubs Association u Ranjit Bajaj u la byrngem ban kiew ïinglieh ïingsaw lada ka AIFF kam lah ban pyntrei ïa kaei ba la pruid dak naduh u snem 2019.
“Ka jingshim khia da ki klob I-League na ka bynta ban bud ïa ki kyndon kumba la priud dak ha ka phutbol hapoh ka ri da ka AFC ka la long pynban ïa ka jingpynkheiñ ïa kaei kaba la iakut,” lka bynrap u Bajaj.`
Na ka liang u acting general secretary ka AIFF u M. Satyanarayan u la ong ba ka executive committee kan sa ïakren halor kane ka bynta ha ka jingïalang ka ban sa ong ha ki 7 ne shiphew sngi ki ban wan.
“Ka jingkyntiew kyrdan ïa ki lahduh ha ka I-League la lah ban pynurlong. Ka jingpynhiar kyrdan ha ka ISL ka dangsah teng namar mynta ki don tang 14 tylli ki kynhun kiba ïashim bynta ha ka aïom ba la lah (2024-25) bad lada pynhiar kyrdan kin don sa tang 13 tylli. Hynrei halor kane ka bynta ngin sa ïakren ha ka jingïalang jong ka executive committee.”
Hynrei u la ai ksai ba halor kane ka mat kan long kaba kham eh namar la dep ïasoi ïa ka Master Rights Agreement (MRA) hapdeng ka AIFF bad ka FSDL ryngkat ki bor pynïaid ka ISL namar kane kan kut haduh u snem ban wan.
