Nongstoiñ, Naitung 05
Ka long kaei-kaei kaba lehse ym lah ban pdiang ha ka imlang-sahlang ha kaba la ong ba uwei u briew uba dei ruh u kpa ka ïing, u la thang ïa ka ïing, ki kot ki sla ba donkam bad wat ïa ki kot skul jong ki khun, ïa ki jaiñ ki nep bad ki tiar ïing tiar sem.
Katei ka jingjia ka la jia ha ka shnong Phud-umbah Sepngi, West Khasi Hills ha ka 5 tarik mynta u bnai ha ka por 1.00 baje mynstep .
Ïa utei u briew uba la leh ïa katei ka kam la tip kyrteng kum u Bah Albertstar Nongphud (kumba 43 snem ka rta). La ong ruh ba katei ka ïing kaba u thang ka bym shym la ing lut ka dei ka ïing shong ka jong u bad ka kurim lem bad ki khun ki kti.
Katkum ka khubor na ki nongïalam shnong katei ka shnong, ha ka 5 tarik mynta u bnai na ka liang jong ka Kur ki khun Kharbani ryngkat ka Kur Nongphud na ka shnong Phudumbah Sepngi ki la leit ban ujor da ka ejahar sha thanat Nongstoiñ.
Shuh shuh ka tyllong khubor ka ïathuh ba utei u briew ha kaba nyngkong eh u la ju mlien ban byrngem thang ïa ka ïing bad ha ka 26 tarik mynshem bnai, u la thang ïa ki kot ki sla kum ka syrnot shongkurim, ki syrnot sngikha jong ki khun bad kiwei-kiwei ki kot ki sla donkam.
Hadien kane, u la byrngem ruh wat ban thang da ki bom siat maw (kiba u ju buh ha ïing), ïa ka ïing hynrei namar ka jingbym lap ïa ka jaka buh ha kata ka sngi, u khlem ïoh lad shuh ban thang.
La ong ruh ba dei tad ha ka step phyrngab jong ka 5 tarik mynta u bnai ba utei u briew u la sei ïa baroh ki tiar ki tar napoh ïing shabar bad u la thang lut syndon ïa ki jingdonkam ha ïing baroh ha kaba um shym la iehnoh wat tang khyndiat ruh, katta naduh ki jaiñ, ki kot skul ki khun, ki tiar ïing tiar sem bad kiwei-kiwei, hynrei donbok ba ym don ba mynsaw namar ka lok bad ki khun ki la phet lypa bad ki la leit thiah sha ka ïing ki bahaïing namar ka jingbyrngem hashuwa katei ka jingjia.
La ïathuh ruh ba katei ka ïing ka dei kaba la shna lyngba ka skhim PMAY – G 2016-17 ha ka jaka jong ka lok, hynrei ka daw kaba pynlong ïa utei u briew kat haduh ban thang ïa ka ïing bad kiwei-kiwei haduh ba thoh ïa kane ka khubor, ym pat tip satia.
