Shillong, Naitung 05
U Lyngdohsad banyngkong jong ka jylla niam Tura, u Bishop George Mamalaserry, ïa uba la ju khot ieid kum u Bishop Mama, u la khlad noh ha ka step jong ka Sngi Thohdieng ha sor Tura hadien ka jingshitom kaba la ban ïa u. Une u Bishop un sah kynmaw kum uwei na ki nongprat lynti bad kyntiew ïa ka pule puthi bad ka koit ka khiah ha Rilum Garo.
U Bishop George, uba la shongthait kum u Lyngdohsad ka Tura, u la khlad ha Holy Cross Hospital ha ka rta kaba 92 snem. Ka jingleit ontep ïa u Bishop George kan long ha ka 8 tarik Naitung ha kaba ïa ka met kaba sah jong u yn tep ha Cathedral Church ha Tura.
La sumar ïa u Bishop George ha katei ka hospital naduh ka 23 tarik Jylliew hadien ba ka jingshitom namar ka jingbym lah ban pynhiar mynsiem ka la ban ïa u, hynrei u la khlad noh hynne ka step ha ka por 2:20.
La kha ïa u Bishop George ha ka 23 tarik Ïaïong, 1932 ha Kalathoor, Kerala, bad hadien ki jingpule, u la leit rung ban long kum u riewniam. Katba u dang pule ha Poonamallee, u la jied ban trei ha ka thaiñ Shatei Lam Mihngi ha ka jylla niam bah Shillong-Guwahati. La kyntang Lyngdoh Sohblei ïa u ha ka 24 tarik Ïaïong, 1960 da u Most Rev. Louis Mathias uba la long u Lyngdohsad ka jylla niam bah Madras Mylapore.
Hadien ka jingshah kyntang kum u Lyngdoh Sohblei, la phah ïa u sha ka jylla niam bah Shillong-Guwahati bad ynda u la poi sha Shillong, la bthah ba u dei ban leit sha Rilum Garo. U la poi ha Tura ha ka 14 tarik Nailar, 1960, bad u la shah thung kum u Assistant Parish Priest ka Tura ha kaba ka kamram jong u ka long ban leit tur sha ki nongkyndong.
Ha u snem 1965, la pynkynriah ïa u sha Baghmara ban long kum u Assistant Parish Priest bad u la trei hapoh u Fr Matthew Elanjipuram uba la long u Missionary banyngkong napdeng ki nong India ha Rilum Garo. Na Baghmara, la pynkynriah ïa u Bishop George sha Dalu ban long kum u Parish Priest ha u snem 1970. Ha ka thma ban pynïoh jinglaitluid ïa ka Bangladesh ha u snem 1971, u Bishop George u la ïarap ïa ki phet wir kiba la wan sha India bad u la ai jaka sah ïa ki.
Ha ka 8 tarik Rymphang, 1979, u Pope John Paul II u la thung ïa u Bishop George kum u Lyngdohsad banyngkong ka jylla niam Tura. La pynkyntang Lyngdohsad ïa u ha ka 18 tarik Lber, 1979 ha Tura.
Ha ka jinglong Lyngdohsad, u Bishop George u la noh ïa u synñiang ban kyntiew ïa ka Rilum Garo khamtam ha ka liang ka pule ka dangle, koit ka khiah bad kiwei ki kam pynroi.
Nalor ka jingseng thymmai ïa ki Parish, u la tei ruh ïa ka 57 tylli ki skul LP, 35 tylli ki skul ME, 16 tylli ki skul Secondary, 2 tylli ki skul Higher Secondary, 24 tylli ki Hostel na ka bynta ki khynnah kynthei bad 23 tylli na ka bynta ki khynnah shynrang.
Ha kaba ïadei bad ka kolej, ha u snem 1988 u la khot sngewbha ïa ki ‘riewniam Salesian ba kin seng ïa ka Don Bosco College ha Tura. Kham hadien, u la khot sa ïa ki ‘riewniam Jesuit ban seng kolej ha Williamnagar.
Ha ka liang ka koit ka khiah, u la shna palat 20 tylli ki Dispensary ha ki shnong ki thaw kiba don Parish bad ïa ka hospital Holy Cross kaba don 150 jingthiah ha Tura.
Nalorkata, u la ïarap ban ai jingkyrshan ïa kiba bun ngut ki samla ban leit pule kum ki nos khnang ba ynda ki wanphai, kin lah ban ïarap ha ki shnong ki thaw ki jong ki. Ka jingseng ïa ka Rino Simonetti Nursing School ka long kum u maw jam ban kyntiew ïa ka jingdon ki nos ha Rilum Garo.
Shuh shuh u Bishop George u la don bynta ban seng ïa ka Montfort Centre ha Danakgre, Tura, KGBV School ha Jengjal nalor kiwei pat. U la don bynta ruh ban seng ïa ka Bakdil kaba long kawei na ki kynhun treimon sngewbha kaba pawkhmat ha Rilum Garo.
Hadien ka jingshakri kaba la neh 28 snem kum u Lyngdohsad, u Bishop George u la shongthait noh ha u snem 2007, hynrei u la ïai bteng ban ai ïa ka jingshakri ka jong u.
Kum ka dak jong ka jingai burom ïa ka jingshakri ka jong u ïa ka Rilum Garo, ka sorkar Meghalaya ha u snem 2019 ka la pynkup da ka khusnam Pa Togan Nengminza Award.
