Shillong, Naitung 05
U nongrah ktien ka India (Ambassador) sha Philippines u Harsh Kumar Jain u la wan sha Meghalaya ha kaba u la ïakynduh ruh ïa u Myntri ka tnat jngohkai ka Jylla u Bah Paul Lyngdoh ha kane ka nongbah.
Ka jingwan u Jain ka long ruh shim bynta ban pynïajan ïa ki ri ka ASEAN kynthup ka ri Philippines bad ki Jylla ka Thaiñ Shatei Lam Mihngi.
U Jain u la ong ba ha ki khyndiat taïew un sa leit sha Philippines kum u nongrah ktien ka India bad ka jingwan sha Shillong ka long ban peit ïa ka jingïadei khamtam haba ka la don lypa ka Act East policy jong ka Sorkar India kaba dei na ka bynta ban kyntiew ïa ka jingïadei hapdeng ka Thaiñ Shatei Lam Mihngi ka ri India bad ki ri kiba hap hapoh ka ASEAN.
U la ong ba u wan ruh ban tip bad sngewthuh ïa ka rukom long ka lariti, ka histori bad ki kam pynroi ha Meghalaya, ha kaba u la ïaroh ïa ka jingitynnad ka Meghalaya khamtam haba u la ïoh ban leit peit ïa ki katto katne ki jaka. U Jain u la ong ruh ka donkam ban kyrshan ïa ki samla pule ka thaiñ ban kin leit pule shabar ri bad ban ai jingtip sha ka Embassy jong ka India ha Manila, Philippines.
Na ka liang u Bah Paul u la ban jur halor ka jingdonkam ban kham pyntbit ïa ki samla ha ki bynta bapher-bapher naduh ka kam jngohkai, lariti bad lad jingsumar ha kaba u la pyntip ba ki nurse na Meghalaya ki la don ruh kiba leit trei sha Japan.
Kumta u kyrmen ba ka jingtbit ha ki bynta bapher-bapher kan ïarap ïa ki samla ka Jylla khamtam haba ki hap ban leit shabar ri na ka bynta kiba bun ki kam ban ai jingshakri. U Bah Paul u la ïaroh ruh ïa ka ri Philippines kum ka ri kaba shongsuk-shongsaiñ bad ka lah bha ban don ka jingïadei bad ka Jylla la ka dei ha ka put ka tem, ka rwai ka siaw bad ka lariti.
